aaj KHun ho ke Tapak paDne ke nazdik hai dil

aaj ḳhuuñ ho ke Tapak paḌne ke nazdīk hai dil

nok-e-nashtar ho to haañ qābil-e-tahrīk hai dil

ai falak tujh ko qasam hai mirī is ko na bujhā

ki ġharīboñ ko charāġh-e-shab-e-tārīk hai dil

varam-e-dāġh ka.ī sāmne rakh kar us ke

ishq bolā ''ye uThā le tirī tamlīk hai dil''

mujh ko hairat hai ki kī umr basar us ne kahāñ

is jahālat pe to ne turk na tājīk hai dil

kamar-e-yār ke mazkūr ko jaane de miyāñ

tū qadam is meñ na rakh raah ye bārīk hai dil

jāma-e-dāġh ko malbūs kar apnā din raat

kyūñki ye jaama tire qad pe nipaT Thiik hai dil

'mus.hafī' ik to maiñ huuñ dast-ḳhush-dīda-e-shoḳh

tis pe din raat mire darpai-e-taz.hīk hai dil

aaj KHun ho ke Tapak paDne ke nazdik hai dil

nok-e-nashtar ho to han qabil-e-tahrik hai dil

ai falak tujh ko qasam hai meri is ko na bujha

ki gharibon ko charagh-e-shab-e-tarik hai dil

waram-e-dagh kai samne rakh kar us ke

ishq bola ye uTha le teri tamlik hai dil

mujh ko hairat hai ki ki umr basar us ne kahan

is jahaalat pe to ne turk na tajik hai dil

kamar-e-yar ke mazkur ko jaane de miyan

tu qadam is mein na rakh rah ye barik hai dil

jama-e-dagh ko malbus kar apna din raat

kyunki ye jama tere qad pe nipaT Thik hai dil

'mushafi' ek to main hun dast-KHush-dida-e-shoKH

tis pe din raat mere darpai-e-tazhik hai dil