dil ne imdad kabhi hasb-e-zarurat nahin di

dil ne imdād kabhī hasb-e-zarūrat nahīñ dī

dasht meñ aql na dī shahr meñ vahshat nahīñ dī

ishq tū aaj bhī hai kis ke lahū se sarsabz

kis muhim ke liye ham ne tujhe ujrat nahīñ dī

dhuup bolī ki maiñ ābā.ī vatan huuñ terā

maiñ ne phir sāya-e-dīvār ko zahmat nahīñ dī

ishq meñ ek baḌā zulm hai sābit-qadamī

vaqt ne bhī hameñ is baab meñ qudrat nahīñ dī

sar salāmat liye lauT aa.e galī se us kī

yaar ne ham ko koī Dhañg kī ḳhidmat nahīñ dī

kaun sī aisī ḳhushī hai jo milī ho ik baar

aur tā-umr hameñ jis ne aziyyat nahīñ dī

ahl-e-dil ne kabhī maḳhlūt hukūmat na banā.ī

aql vāloñ ne bhī be-shart himāyat nahīñ dī

'farhat-ehsās' to ham ḳhud hī bane haiñ varna

farhat-ullāh ne kabhī is kī ijāzat nahīñ dī

dil ne imdad kabhi hasb-e-zarurat nahin di

dasht mein aql na di shahr mein wahshat nahin di

ishq tu aaj bhi hai kis ke lahu se sarsabz

kis muhim ke liye hum ne tujhe ujrat nahin di

dhup boli ki main aabai watan hun tera

main ne phir saya-e-diwar ko zahmat nahin di

ishq mein ek baDa zulm hai sabit-qadami

waqt ne bhi hamein is bab mein qudrat nahin di

sar salamat liye lauT aae gali se us ki

yar ne hum ko koi Dhang ki KHidmat nahin di

kaun si aisi KHushi hai jo mili ho ek bar

aur ta-umr hamein jis ne aziyyat nahin di

ahl-e-dil ne kabhi maKHlut hukumat na banai

aql walon ne bhi be-shart himayat nahin di

'farhat-ehsas' to hum KHud hi bane hain warna

farhat-ullah ne kabhi is ki ijazat nahin di