dil mein murghan-e-chaman ke to guman aur hi hai

dil meñ murġhān-e-chaman ke to gumāñ aur hī hai

par dil-e-zār kā andāz-e-fuġhāñ aur hī hai

qad-e-nau-ḳhez nahīñ āfat-e-jāñ aur hī hai

jis pe dil apnā gayā hai vo javāñ aur hī hai

ham jahāñ rahte haiñ yaaro vo jahāñ aur hī hai

vo jagah aur hī hai aur vo makāñ aur hī hai

shafaqī rañg pe mat bhūliyo apne ai abr

chashm-e-ḳhushk aur mizha-e-ashk-fishāñ aur hī hai

badan āġhushta-ba-ḳhūñ hone pe mauqūf nahīñ

zaḳhmī-e-nāvak-e-mizhgāñ kā nishāñ aur hī hai

go ki auroñ kī huiiñ surme se āñkheñ raushan

surma-e-bīnish-e-sāhib-nazarāñ aur hī hai

garche rakhte haiñ nazākat ye sabhī mū-kamrāñ

vo nazākat hai judī aur vo miyāñ aur hī hai

'mus.hafī' garche ye sab kahte haiñ ham se behtar

apnī par reḳhta-goī kī zabāñ aur hī hai

dil mein murghan-e-chaman ke to guman aur hi hai

par dil-e-zar ka andaz-e-fughan aur hi hai

qad-e-nau-KHez nahin aafat-e-jaan aur hi hai

jis pe dil apna gaya hai wo jawan aur hi hai

hum jahan rahte hain yaro wo jahan aur hi hai

wo jagah aur hi hai aur wo makan aur hi hai

shafaqi rang pe mat bhuliyo apne ai abr

chashm-e-KHushk aur mizha-e-ashk-fishan aur hi hai

badan aaghushta-ba-KHun hone pe mauquf nahin

zaKHmi-e-nawak-e-mizhgan ka nishan aur hi hai

go ki auron ki huin surme se aankhen raushan

surma-e-binish-e-sahib-nazaran aur hi hai

garche rakhte hain nazakat ye sabhi mu-kamran

wo nazakat hai judi aur wo miyan aur hi hai

'mushafi' garche ye sab kahte hain hum se behtar

apni par reKHta-goi ki zaban aur hi hai