dil-lagi apni tere zikr se kis raat na thi

dil-lagī apnī tire zikr se kis raat na thī

sub.h tak shaam se yā-hū ke sivā baat na thī

iltijā tujh se kab ai qibla-e-hājāt na thī

terī dargāh meñ kis roz munājāt na thī

ab mulāqāt huī hai to mulāqāt rahe

na mulāqāt thī jab tak ki mulāqāt na thī

ġhuncha-e-gul ko na hañsnā thā tirī sūrat se

chhoTe se muñh kī sazā-vār baḌī baat na thī

ibtidā se tujhe maujūd samajhtā thā maiñ

mire tere kabhī parde kī mulāqāt na thī

ai nasīm-e-saharī bahr-e-asīrān-e-qafas

tohfa-tar nik.hat-e-gul se koī sauġhāt na thī

un dinoñ 'ishq rulātā thā hameñ sūrat-e-abr

kaun sī fasl thī vo jis meñ ki barsāt na thī

kyā kahūñ us ke jo mujh par karam-e-pinhāñ the

zāhirī yaar se har-chand mulāqāt na thī

apne bāñdhe ho.e gaatī tujhe dekhā phaḌkā

dilrubā shai thī mirī jaan tirī gaat na thī

ek meñ mil ga.e ai shāh-savār ahl-e-niyāz

nāz-e-ma.ashūq thā tū sun kī tire laat na thī

lab ke bose kā hai inkār ta'ajjub ai yaar

phere saa.il se jo muñh ko vo tirī zaat na thī

kamar-e-yār thī az-bas-ki nihāyat nāzuk

sūjhtī bandish-e-mazmūñ kī koī ghaat na thī

un dinoñ hotā thā tū ghar meñ hamāre shab-bāsh

roz-e-raushan se kam ai mehr-laqā raat na thī

be-shu.ūroñ ne na samjhā to na samjhā 'ātish'

nukta-sanjoñ ko latīfa thī tirī baat na thī

dil-lagi apni tere zikr se kis raat na thi

subh tak sham se ya-hu ke siwa baat na thi

iltija tujh se kab ai qibla-e-hajat na thi

teri dargah mein kis roz munajat na thi

ab mulaqat hui hai to mulaqat rahe

na mulaqat thi jab tak ki mulaqat na thi

ghuncha-e-gul ko na hansna tha teri surat se

chhoTe se munh ki saza-war baDi baat na thi

ibtida se tujhe maujud samajhta tha main

mere tere kabhi parde ki mulaqat na thi

ai nasim-e-sahari bahr-e-asiran-e-qafas

tohfa-tar nikhat-e-gul se koi saughat na thi

un dinon 'ishq rulata tha hamein surat-e-abr

kaun si fasl thi wo jis mein ki barsat na thi

kya kahun us ke jo mujh par karam-e-pinhan the

zahiri yar se har-chand mulaqat na thi

apne bandhe hoe gati tujhe dekha phaDka

dilruba shai thi meri jaan teri gat na thi

ek mein mil gae ai shah-sawar ahl-e-niyaz

naz-e-mashuq tha tu sun ki tere lat na thi

lab ke bose ka hai inkar ta'ajjub ai yar

phere sail se jo munh ko wo teri zat na thi

kamar-e-yar thi az-bas-ki nihayat nazuk

sujhti bandish-e-mazmun ki koi ghat na thi

un dinon hota tha tu ghar mein hamare shab-bash

roz-e-raushan se kam ai mehr-laqa raat na thi

be-shuuron ne na samjha to na samjha 'atish'

nukta-sanjon ko latifa thi teri baat na thi