dil hai ghiza-e-ranj jigar hai ghiza-e-ranj

dil hai ġhizā-e-rañj jigar hai ġhizā-e-rañj

paidā kiyā hai ham ko ḳhudā ne barā-e-rañj

hāsil kisī se kuchh nahīñ hotā sivā-e-rañj

duniyā meñ laa.ī hai hameñ qismat barā-e-rañj

aadam se bāġh-e-ḳhuld chhuTā ham se kū-e-yār

vo ibtidā-e-rañj hai ye intihā-e-rañj

mumkin nahīñ hai aa.e jo bū-e-gul-e-nashāt

aise dimāġh-e-jāñ meñ bharī hai havā-e-rañj

jhiḌkī de gāliyāñ de sitamgar zalīl kar

kāfir ho ai sanam jo zarā dil meñ laa.e rañj

ham naḳhl-e-āh se chaman-e-rozgār meñ

bāñdhā kiye havā paye nashv-o-numā-e-rañj

ai sān-e-azal mirī miTTī ḳharāb kī

kyā chāhiye thī ḳhāna-e-dil meñ binā-e-rañj

sab dost apnī haal meñ haiñ aap mubtalā

kis se kahūñ maiñ kaun sune mājrā-e-rañj

ham bār-e-ishq ke mutahammil na ho sake

bas dil pakaḌ ke baiTh ga.e vo uThā.e rañj

haiñ sikka-hā-e-dāġh hazāroñ bhare hue

qasr-e-dil-e-faqīr hai daulat sarā-e-rañj

bhūlī nahīñ nasīb ke likkhe kī ḳhūbiyāñ

tahrīr lauh-e-dil pe hai sab mājrā-e-rañj

mumkin nahīñ mizāj rahe ek haal par

gah āshnā-e-aish haiñ gah āshnā-e-rañj

achchhe ye qahqahe nahīñ āshiq ke haal par

dekho hañsī hañsī meñ kahīñ ho na jaa.e rañj

hote haiñ kis libās meñ ash.ār-e-dardnāk

bahr-e-urūs fikr hai zebā ridā-e-rañj

kyā ġham jo kū-e-yār meñ hotā huuñ pā.emāl

fart-e-ḳhushī se ḳhaak nahīñ dil meñ jaa.e rañj

kahte haiñ mere dost mirā haal dekh kar

dushman ko bhī ḳhudā na kare mubtalā-e-rañj

saudā-e-ishq meñ ye sa.ādat husūl hai

baḳht-e-siyah hai sāya-e-bāl-e-humā-e-rañj

andher sadma-e-shab-e-furqat hai ai 'sabā'

āñdhī charāġh-e-jāñ ke liye hai havā-e-rañj

dil hai ghiza-e-ranj jigar hai ghiza-e-ranj

paida kiya hai hum ko KHuda ne bara-e-ranj

hasil kisi se kuchh nahin hota siwa-e-ranj

duniya mein lai hai hamein qismat bara-e-ranj

aadam se bagh-e-KHuld chhuTa hum se ku-e-yar

wo ibtida-e-ranj hai ye intiha-e-ranj

mumkin nahin hai aae jo bu-e-gul-e-nashat

aise dimagh-e-jaan mein bhari hai hawa-e-ranj

jhiDki de galiyan de sitamgar zalil kar

kafir ho ai sanam jo zara dil mein lae ranj

hum naKHl-e-ah se chaman-e-rozgar mein

bandha kiye hawa paye nashw-o-numa-e-ranj

ai san-e-azal meri miTTi KHarab ki

kya chahiye thi KHana-e-dil mein bina-e-ranj

sab dost apni haal mein hain aap mubtala

kis se kahun main kaun sune majra-e-ranj

hum bar-e-ishq ke mutahammil na ho sake

bas dil pakaD ke baiTh gae wo uThae ranj

hain sikka-ha-e-dagh hazaron bhare hue

qasr-e-dil-e-faqir hai daulat sara-e-ranj

bhuli nahin nasib ke likkhe ki KHubiyan

tahrir lauh-e-dil pe hai sab majra-e-ranj

mumkin nahin mizaj rahe ek haal par

gah aashna-e-aish hain gah aashna-e-ranj

achchhe ye qahqahe nahin aashiq ke haal par

dekho hansi hansi mein kahin ho na jae ranj

hote hain kis libas mein ashaar-e-dardnak

bahr-e-urus fikr hai zeba rida-e-ranj

kya gham jo ku-e-yar mein hota hun paemal

fart-e-KHushi se KHak nahin dil mein jae ranj

kahte hain mere dost mera haal dekh kar

dushman ko bhi KHuda na kare mubtala-e-ranj

sauda-e-ishq mein ye saadat husul hai

baKHt-e-siyah hai saya-e-baal-e-huma-e-ranj

andher sadma-e-shab-e-furqat hai ai 'saba'

aandhi charagh-e-jaan ke liye hai hawa-e-ranj