dil-e-pur dagh bagh kis ka hai

dil-e-pur daaġh baaġh kis kā hai

dīda-e-tar ayāġh kis kā hai

mai-kada sehn-e-bāġh kis kā hai

sāġhar-e-gul ayāġh kis kā hai

daaġh chamkā chalī nasīm-e-bahār

ye havā meñ charāġh kis kā hai

kyuuñ kaheñ zulf-e-yār ko sumbul

yaañ pareshāñ dimāġh kis kā hai

dil-e-pur-dāġh kī yahī hai bahār

na khule ḳhāna baaġh kis kā hai

nāsehā maġhz kyuuñ phirātā hai

chal tirā sā dimāġh kis kā hai

chaar unsur ke sab tamāshe haiñ

vaah ye chār-bāġh kis kā hai

arsh-e-ālī pe fikr-e-ālī hai

ham ne paayā surāġh kis kā hai

kis kā maskan hai sīna-e-ārif

dil-e-raushan charāġh kis kā hai

jeb-e-gul kis pe chaak rahtā hai

dil meñ laale ke daaġh kis kā hai

dīn-o-duniyā ko tark kar baiThe

aur naam infirāġh kis kā hai

ai junūñ tere vāste sab haiñ

baaġh kis kā hai raaġh kis kā hai

yaar allāh re terā aalam

dekh ye dil meñ daaġh kis kā hai

māh-rū aur bhī haiñ duniyā meñ

yuuñ falak par dimāġh kis kā hai

ai 'sabā' is zamīñ meñ aise sher

aisā aalī dimāġh kis kā hai

dil-e-pur dagh bagh kis ka hai

dida-e-tar ayagh kis ka hai

mai-kada sehn-e-bagh kis ka hai

saghar-e-gul ayagh kis ka hai

dagh chamka chali nasim-e-bahaar

ye hawa mein charagh kis ka hai

kyun kahen zulf-e-yar ko sumbul

yan pareshan dimagh kis ka hai

dil-e-pur-dagh ki yahi hai bahaar

na khule KHana bagh kis ka hai

naseha maghz kyun phiraata hai

chal tera sa dimagh kis ka hai

chaar unsur ke sab tamashe hain

wah ye chaar-bagh kis ka hai

arsh-e-ali pe fikr-e-ali hai

hum ne paya suragh kis ka hai

kis ka maskan hai sina-e-arif

dil-e-raushan charagh kis ka hai

jeb-e-gul kis pe chaak rahta hai

dil mein lale ke dagh kis ka hai

din-o-duniya ko tark kar baiThe

aur nam infiragh kis ka hai

ai junun tere waste sab hain

bagh kis ka hai ragh kis ka hai

yar allah re tera aalam

dekh ye dil mein dagh kis ka hai

mah-ru aur bhi hain duniya mein

yun falak par dimagh kis ka hai

ai 'saba' is zamin mein aise sher

aisa aali dimagh kis ka hai