DhunDoge agar mulkon mulkon milne ke nahin nayab hain hum

DhūñDoge agar mulkoñ mulkoñ milne ke nahīñ nāyāb haiñ ham

jo yaad na aa.e bhuul ke phir ai ham-nafaso vo ḳhvāb haiñ ham

maiñ hairat o hasrat kā maarā ḳhāmosh khaḌā huuñ sāhil par

dariyā-e-mohabbat kahtā hai aa kuchh bhī nahīñ pāyāb haiñ ham

ho jaa.e bakheḌā paak kahīñ paas apne bulā leñ behtar hai

ab dard-e-judā.ī se un kī ai aah bahut betāb haiñ ham

ai shauq burā is vahm kā ho maktūb tamām apnā na huā

vaañ chehre pe un ke ḳhat niklā yaañ bhūle hue alqāb haiñ ham

kis tarah taḌapte jī bhar kar yaañ zo.af ne mushkīñ kas diiñ haiñ

ho band aur ātish par ho chaḌhā sīmāb bhī vo sīmāb haiñ ham

ai shauq patā kuchh tū hī batā ab tak ye karishma kuchh na khulā

ham meñ hai dil-e-betāb nihāñ yā aap dil-e-betāb haiñ ham

lākhoñ hī musāfir chalte haiñ manzil pe pahuñchte haiñ do ek

ai ahl-e-zamāna qadr karo nāyāb na hoñ kam-yāb haiñ ham

murġhān-e-qafas ko phūloñ ne ai 'shād' ye kahlā bhejā hai

aa jaao jo tum ko aanā ho aise meñ abhī shādāb haiñ ham

DhunDoge agar mulkon mulkon milne ke nahin nayab hain hum

jo yaad na aae bhul ke phir ai ham-nafaso wo KHwab hain hum

main hairat o hasrat ka mara KHamosh khaDa hun sahil par

dariya-e-mohabbat kahta hai aa kuchh bhi nahin payab hain hum

ho jae bakheDa pak kahin pas apne bula len behtar hai

ab dard-e-judai se un ki ai aah bahut betab hain hum

ai shauq bura is wahm ka ho maktub tamam apna na hua

wan chehre pe un ke KHat nikla yan bhule hue alqab hain hum

kis tarah taDapte ji bhar kar yan zoaf ne mushkin kas din hain

ho band aur aatish par ho chaDha simab bhi wo simab hain hum

ai shauq pata kuchh tu hi bata ab tak ye karishma kuchh na khula

hum mein hai dil-e-betab nihan ya aap dil-e-betab hain hum

lakhon hi musafir chalte hain manzil pe pahunchte hain do ek

ai ahl-e-zamana qadr karo nayab na hon kam-yab hain hum

murghan-e-qafas ko phulon ne ai 'shad' ye kahla bheja hai

aa jao jo tum ko aana ho aise mein abhi shadab hain hum