main ek shaKHs ko itna qarib laya tha

maiñ ek shaḳhs ko itnā qarīb laayā thā

mujhe ye lagne lagā thā vo merā saayā thā

sunā hai maiñ ne vo momin bhī ho gayā kāfir

vo jis ne 'ishq kā kalma mujhe paḌhāyā thā

vo jis ne dil meñ mohabbat kī lau lagā.ī thī

usī ne phūñk se apnī diyā bujhāyā thā

maiñ apne hisse kī ḳhushiyāñ bhī us ko de aayā

vo jis ke zulm ne mujh ko bahut rulāyā thā

use to sirf mohabbat thī merī daulat se

maiñ sochtā thā mire pyaar ne rijhāyā thā

tamām 'umr vo ārām mil nahīñ paayā

sukūn maañ tire āñchal meñ jitnā paayā thā

maiñ sochtā thā bujhā.egā merī pyaas 'kabīr'

vo ik sarāb thā jis se fareb khāyā thā

main ek shaKHs ko itna qarib laya tha

mujhe ye lagne laga tha wo mera saya tha

suna hai main ne wo momin bhi ho gaya kafir

wo jis ne 'ishq ka kalma mujhe paDhaya tha

wo jis ne dil mein mohabbat ki lau lagai thi

usi ne phunk se apni diya bujhaya tha

main apne hisse ki KHushiyan bhi us ko de aaya

wo jis ke zulm ne mujh ko bahut rulaya tha

use to sirf mohabbat thi meri daulat se

main sochta tha mere pyar ne rijhaya tha

tamam 'umr wo aaram mil nahin paya

sukun man tere aanchal mein jitna paya tha

main sochta tha bujhaega meri pyas 'kabir'

wo ek sarab tha jis se fareb khaya tha