Dhal gai hasti-e-dil yun teri ranai mein

Dhal ga.ī hastī-e-dil yuuñ tirī ra.anā.ī meñ

mādda jaise nikhar jaa.e tavānā.ī meñ

pahle manzil pas-e-manzil pas-e-manzil aur phir

rāste Duub ga.e ālam-e-tanhā.ī meñ

gaahe gaahe koī jugnū sā chamak uThtā hai

mere zulmat-kada-e-anjuman-ārā.ī meñ

DhūñDhtā phirtā huuñ ḳhud apnī basārat kī hudūd

kho ga.ī haiñ mirī nazreñ mirī bīnā.ī meñ

un se mahfil meñ mulāqāt bhī kam thī na magar

uf vo ādāb jo barte ga.e tanhā.ī meñ

yuuñ lagā jaise ki bal khā ke dhanak TuuT ga.ī

us ne vaqfa jo liyā naaz se añgḌā.ī meñ

kis ne dekhe haiñ tirī ruuh ke riste hue zaḳhm

kaun utrā hai tire qalb kī gahrā.ī meñ

Dhal gai hasti-e-dil yun teri ranai mein

madda jaise nikhar jae tawanai mein

pahle manzil pas-e-manzil pas-e-manzil aur phir

raste Dub gae aalam-e-tanhai mein

gahe gahe koi jugnu sa chamak uThta hai

mere zulmat-kada-e-anjuman-arai mein

DhunDhta phirta hun KHud apni basarat ki hudud

kho gai hain meri nazren meri binai mein

un se mahfil mein mulaqat bhi kam thi na magar

uf wo aadab jo barte gae tanhai mein

yun laga jaise ki bal kha ke dhanak TuT gai

us ne waqfa jo liya naz se angDai mein

kis ne dekhe hain teri ruh ke riste hue zaKHm

kaun utra hai tere qalb ki gahrai mein