daur-e-hayat aaega qatil qaza ke baad

daur-e-hayāt aa.egā qātil qazā ke ba.ad

hai ibtidā hamārī tirī intihā ke ba.ad

jiinā vo kyā ki dil meñ na ho terī aarzū

baaqī hai maut hī dil-e-be-mudda.ā ke ba.ad

tujh se muqāble kī kise taab hai vale

merā lahū bhī ḳhuub hai terī hinā ke ba.ad

ik shahr-e-ārzū pe bhī honā paḌā ḳhajil

hal-mimmazīd kahtī hai rahmat duā ke ba.ad

lazzat hanūz mā.ida-e-ishq meñ nahīñ

aatā hai lutf-e-jurm-e-tamannā sazā ke ba.ad

qatl-e-husain asl meñ marg-e-yazīd hai

islām zinda hotā hai har karbalā ke ba.ad

ġhairoñ pe lutf ham se alag haif hai agar

ye be-hijābiyāñ bhī hoñ uzr-e-hayā ke ba.ad

mumkin hai naala jabr se ruk bhī sake agar

ham par to hai vafā kā taqāzā jafā ke ba.ad

hai kis ke bal pe hazrat-e-'jauhar' ye rū-kashī

DhūñDeñge aap kis kā sahārā ḳhudā ke ba.ad

daur-e-hayat aaega qatil qaza ke baad

hai ibtida hamari teri intiha ke baad

jina wo kya ki dil mein na ho teri aarzu

baqi hai maut hi dil-e-be-muddaa ke baad

tujh se muqable ki kise tab hai wale

mera lahu bhi KHub hai teri hina ke baad

ek shahr-e-arzu pe bhi hona paDa KHajil

hal-mimmazid kahti hai rahmat dua ke baad

lazzat hanuz maida-e-ishq mein nahin

aata hai lutf-e-jurm-e-tamanna saza ke baad

qatl-e-husain asl mein marg-e-yazid hai

islam zinda hota hai har karbala ke baad

ghairon pe lutf hum se alag haif hai agar

ye be-hijabiyan bhi hon uzr-e-haya ke baad

mumkin hai nala jabr se ruk bhi sake agar

hum par to hai wafa ka taqaza jafa ke baad

hai kis ke bal pe hazrat-e-'jauhar' ye ru-kashi

DhunDenge aap kis ka sahaara KHuda ke baad