dasht-e-tanhai mein kal raat hawa kaisi thi

dasht-e-tanhā.ī meñ kal raat havā kaisī thī

der tak TūTte lamhoñ kī sadā kaisī thī

zindagī ne mirā pīchhā nahīñ chhoḌā ab tak

umr bhar sar se na utrī ye balā kaisī thī

sunte rahte the mohabbat ke fasāne kyā kyā

buuñd bhar dil pe na barsī ye ghaTā kaisī thī

kyā milā faisla-e-tark-e-ta.alluq kar ke

tum jo bichhḌe the to hoñToñ pe duā kaisī thī

TuuT kar ḳhud jo vo bikhrā hai to mālūm huā

jis se lipTā thā vo dīvār-e-anā kaisī thī

jism se noch ke pheñkī bhī to ḳhushbū na ga.ī

ye rivāyāt kī bosīda qabā kaisī thī

Dūbte vaqt bhañvar pūchh rahā hai 'qaisar'

jab kināre se chale the to fazā kaisī thī

dasht-e-tanhai mein kal raat hawa kaisi thi

der tak TuTte lamhon ki sada kaisi thi

zindagi ne mera pichha nahin chhoDa ab tak

umr bhar sar se na utri ye bala kaisi thi

sunte rahte the mohabbat ke fasane kya kya

bund bhar dil pe na barsi ye ghaTa kaisi thi

kya mila faisla-e-tark-e-talluq kar ke

tum jo bichhDe the to honTon pe dua kaisi thi

TuT kar KHud jo wo bikhra hai to malum hua

jis se lipTa tha wo diwar-e-ana kaisi thi

jism se noch ke phenki bhi to KHushbu na gai

ye riwayat ki bosida qaba kaisi thi

Dubte waqt bhanwar puchh raha hai 'qaisar'

jab kinare se chale the to faza kaisi thi