chamakti wusaton mein jo gul-e-sahra khila hai

chamaktī vus.atoñ meñ jo gul-e-sahrā khilā hai

koī kah de agar pahle kabhī aisā khilā hai

azal se gulshan-e-hastī meñ hai maujūd bhī vo

magar lagtā hai jaise aaj hī taaza khilā hai

baham kaise hue haiñ dekhnā ḳhvāb aur ḳhushbū

guzarte mausamoñ kā āḳhirī tohfa khilā hai

lahū meñ ik alag andāz se mastūr thā vo

sar-e-shāḳh-e-tamāshā aur bhī tanhā khilā hai

kahāñ ḳhāk-e-madīna aur kahāñ ḳhākistar-e-dil

kahāñ kā phuul thā lekin kahāñ par aa khilā hai

kabhī dil par girī thī shabnam-e-ism-e-mohammad

mirī har saañs meñ kaliyoñ kā majmua khilā hai

yahī rauzan banegā ek din dīvār-e-jāñ meñ

mire dil meñ nidāmat kā jo ik lamha khilā hai

yahīñ tak laa.ī hai ye zindagī bhar kī masāfat

lab-e-dariyā huuñ maiñ aur vo pas-e-dariyā khilā hai

bikhartā jā rahā hai duur tak rañg-e-judā.ī

'zafar' kyā pūchhte ho zaḳhm-e-dil kaisā khilā hai

chamakti wusaton mein jo gul-e-sahra khila hai

koi kah de agar pahle kabhi aisa khila hai

azal se gulshan-e-hasti mein hai maujud bhi wo

magar lagta hai jaise aaj hi taza khila hai

baham kaise hue hain dekhna KHwab aur KHushbu

guzarte mausamon ka aaKHiri tohfa khila hai

lahu mein ek alag andaz se mastur tha wo

sar-e-shaKH-e-tamasha aur bhi tanha khila hai

kahan KHak-e-madina aur kahan KHakistar-e-dil

kahan ka phul tha lekin kahan par aa khila hai

kabhi dil par giri thi shabnam-e-ism-e-mohammad

meri har sans mein kaliyon ka majmua khila hai

yahi rauzan banega ek din diwar-e-jaan mein

mere dil mein nidamat ka jo ek lamha khila hai

yahin tak lai hai ye zindagi bhar ki masafat

lab-e-dariya hun main aur wo pas-e-dariya khila hai

bikharta ja raha hai dur tak rang-e-judai

'zafar' kya puchhte ho zaKHm-e-dil kaisa khila hai