bulandi der tak kis shaKHs ke hisse mein rahti hai

bulandī der tak kis shaḳhs ke hisse meñ rahtī hai

bahut ūñchī 'imārat har ghaḌī ḳhatre meñ rahtī hai

bahut jī chāhtā hai qaid-e-jāñ se ham nikal jaa.eñ

tumhārī yaad bhī lekin isī malbe meñ rahtī hai

ye aisā qarz hai jo maiñ adā kar hī nahīñ saktā

maiñ jab tak ghar na lauTūñ merī maañ sajde meñ rahtī hai

amīrī resham-o-kam-ḳhvāb meñ nangī nazar aa.ī

ġharībī shaan se ik TaaT ke parde meñ rahtī hai

maiñ insāñ huuñ bahak jaanā mirī fitrat meñ shāmil hai

havā bhī us ko chhū kar der tak nashshe meñ rahtī hai

mohabbat meñ parakhne jāñchne se fā.eda kyā hai

kamī thoḌī bahut har ek ke shajre meñ rahtī hai

ye apne aap ko taqsīm kar letā hai sūboñ meñ

ḳharābī bas yahī har mulk ke naqshe meñ rahtī hai

bulandi der tak kis shaKHs ke hisse mein rahti hai

bahut unchi 'imarat har ghaDi KHatre mein rahti hai

bahut ji chahta hai qaid-e-jaan se hum nikal jaen

tumhaari yaad bhi lekin isi malbe mein rahti hai

ye aisa qarz hai jo main ada kar hi nahin sakta

main jab tak ghar na lauTun meri man sajde mein rahti hai

amiri resham-o-kam-KHwab mein nangi nazar aai

gharibi shan se ek TaT ke parde mein rahti hai

main insan hun bahak jaana meri fitrat mein shamil hai

hawa bhi us ko chhu kar der tak nashshe mein rahti hai

mohabbat mein parakhne jaanchne se faeda kya hai

kami thoDi bahut har ek ke shajre mein rahti hai

ye apne aap ko taqsim kar leta hai subon mein

KHarabi bas yahi har mulk ke naqshe mein rahti hai