sar ye har haal jhuka humne qanaat ki thi

sar ye har haal jhukā ham ne qanā'at kī thī

ik tirī baar hī bas rab se shikāyat kī thī

is qadar saḳht sazā bhī to nahīñ bantī thī

ham ne bachpan se nikalne kī sharārat kī thī

hosh vāloñ kī na bātoñ meñ hamī aa.e kabhī

varna har ik ne sañbhalne kī hidāyat kī thī

mo'tabar the kabhī duniyā kī nazar meñ ham bhī

phir huā yuuñ ki mirī tum ne himāyat kī thī

ham ne maanā ki chalo markazī mujrim ham haiñ

kuchh dinoñ tum ne bhī to ham se mohabbat kī thī

be-vafāoñ se vafā ḳhabt hai lā-hāsil sā

hameñ mā'lūm thā phir bhī ye himāqat kī thī

naf' nuqsān kī bāteñ nahīñ jachtī ham ko

ham ne kab yaar tire saath tijārat kī thī

mubtalā taaza hai tū ḳhush hai mohabbat se to sun

us ne āġhāz meñ ham par bhī 'ināyat kī thī

kyuuñ zabānoñ pe faqat naam tirā hai 'abrak'

tum se pahle bhī to kitnoñ ne baġhāvat kī thī

sar ye har haal jhuka hum ne qana'at ki thi

ek teri bar hi bas rab se shikayat ki thi

is qadar saKHt saza bhi to nahin banti thi

hum ne bachpan se nikalne ki shararat ki thi

hosh walon ki na baaton mein hami aae kabhi

warna har ek ne sanbhalne ki hidayat ki thi

mo'tabar the kabhi duniya ki nazar mein hum bhi

phir hua yun ki meri tum ne himayat ki thi

hum ne mana ki chalo markazi mujrim hum hain

kuchh dinon tum ne bhi to hum se mohabbat ki thi

be-wafaon se wafa KHabt hai la-hasil sa

hamein ma'lum tha phir bhi ye himaqat ki thi

naf' nuqsan ki baaten nahin jachti hum ko

hum ne kab yar tere sath tijarat ki thi

mubtala taza hai tu KHush hai mohabbat se to sun

us ne aaghaz mein hum par bhi 'inayat ki thi

kyun zabanon pe faqat nam tera hai 'abrak'

tum se pahle bhi to kitnon ne baghawat ki thi