nahin hota guzara ghar nahin hai

nahīñ hotā guzārā ghar nahīñ hai

sabhī kuchh hai hamārā ghar nahīñ hai

ye ghar sahrā hai jangal hai qafas bhī

ye ghar saare kā saarā ghar nahīñ hai

tujhe kis muñh se apne ghar bulā.eñ

tire qābil hamārā ghar nahīñ hai

jagā kar shaiḳh ne bolā ki jaao

ye masjid hai tumhārā ghar nahīñ hai

madad lene maiñ jis ke ghar gayā thā

vo andar se pukārā ghar nahīñ hai

yaqīñ maano mire jaane se pahle

yahīñ par thā hamārā ghar nahīñ hai

ye kahtī hai nazar mālik-makāñ kī

tumhārā ghar tumhārā ghar nahīñ hai

maiñ ik maañ huuñ karūñ ārām kaise

mirī āñkhoñ kā taarā ghar nahīñ hai

mohabbat aur sukūñ hai naam ghar kā

ye patthar aur gaarā ghar nahīñ hai

nahīñ sālim mirā sāmān koī

hai ye vāzeh ishāra ghar nahīñ hai

ḳhudā ke ghar ke aage be-gharoñ ne

lagāyā hai ye nā'ra ghar nahīñ hai

talāsh-e-rizq meñ niklā huā hai

ka.ī din se bichāra ghar nahīñ hai

tujhe bhī ḳhvāhish-e-jang-o-jadal hai

'razā' tujh ko bhī pyārā ghar nahīñ hai

nahin hota guzara ghar nahin hai

sabhi kuchh hai hamara ghar nahin hai

ye ghar sahra hai jangal hai qafas bhi

ye ghar sare ka sara ghar nahin hai

tujhe kis munh se apne ghar bulaen

tere qabil hamara ghar nahin hai

jaga kar shaiKH ne bola ki jao

ye masjid hai tumhaara ghar nahin hai

madad lene main jis ke ghar gaya tha

wo andar se pukara ghar nahin hai

yaqin mano mere jaane se pahle

yahin par tha hamara ghar nahin hai

ye kahti hai nazar malik-makan ki

tumhaara ghar tumhaara ghar nahin hai

main ek man hun karun aaram kaise

meri aankhon ka tara ghar nahin hai

mohabbat aur sukun hai nam ghar ka

ye patthar aur gara ghar nahin hai

nahin salim mera saman koi

hai ye wazeh ishaara ghar nahin hai

KHuda ke ghar ke aage be-gharon ne

lagaya hai ye na'ra ghar nahin hai

talash-e-rizq mein nikla hua hai

kai din se bichaara ghar nahin hai

tujhe bhi KHwahish-e-jang-o-jadal hai

'raza' tujh ko bhi pyara ghar nahin hai