baja ki dushman-e-jaan shahr-e-jaan ke bahar hai

bajā ki dushman-e-jāñ shahr-e-jāñ ke bāhar hai

magar maiñ us ko kahūñ kyā jo ghar ke andar hai

tamām naqsh parindoñ kī tarah utre haiñ

ki kāġhazoñ pe khile pāniyoñ kā manzar hai

maiñ ek shaḳhs jo kumboñ meñ rah gayā baT kar

maiñ musht-e-ḳhāk jo taqsīm ho ke be-ghar hai

shajar kaTā to koī ghoñsla kahīñ na rahā

magar ik uḌtā parinda fazā kā zevar hai

vo ḳhauf hai ki makīñ apne apne kamroñ meñ haiñ

vo haal hai ki bayābāñ meñ vus.at-e-dar hai

kahīñ bhī peḌ nahīñ phir bhī patthar aa.e haiñ

galī meñ koī nahīñ phir bhī shor-e-mahshar hai

maiñ is vasī.a jazīre meñ vāhid insāñ huuñ

ki mere chāroñ taraf dasht kā samundar hai

koī bhī ḳhvāb na ūñchī fasīl se utrā

magar kiran ke guzarne ko rauzan-e-dar hai

tamām raushaniyāñ bujh ga.ī haiñ bastī meñ

magar vo diip ki jis kā havāoñ meñ ghar hai

kisī se mujh ko gila kyā ki kuchh kahūñ 'aḳhtar'

ki merī zaat hī ḳhud rāste kā patthar hai

baja ki dushman-e-jaan shahr-e-jaan ke bahar hai

magar main us ko kahun kya jo ghar ke andar hai

tamam naqsh parindon ki tarah utre hain

ki kaghazon pe khile paniyon ka manzar hai

main ek shaKHs jo kumbon mein rah gaya baT kar

main musht-e-KHak jo taqsim ho ke be-ghar hai

shajar kaTa to koi ghonsla kahin na raha

magar ek uDta parinda faza ka zewar hai

wo KHauf hai ki makin apne apne kamron mein hain

wo haal hai ki bayaban mein wusat-e-dar hai

kahin bhi peD nahin phir bhi patthar aae hain

gali mein koi nahin phir bhi shor-e-mahshar hai

main is wasia jazire mein wahid insan hun

ki mere chaaron taraf dasht ka samundar hai

koi bhi KHwab na unchi fasil se utra

magar kiran ke guzarne ko rauzan-e-dar hai

tamam raushaniyan bujh gai hain basti mein

magar wo dip ki jis ka hawaon mein ghar hai

kisi se mujh ko gila kya ki kuchh kahun 'aKHtar'

ki meri zat hi KHud raste ka patthar hai