baad-e-shimal chalne lagi ang ang mein

bād-e-shimāl chalne lagī ang ang meñ

lipTā hai kaun mujh se ye patjhaḌ ke rang meñ

ḳhvāhish ke kārobār se bachnā muhāl hai

utregā tū bhī saath mire is surañg meñ

maiñ āñdhiyoñ meñ haath bhī pakḌūñ tirā to kyā

ik shāḳh-e-be-siper huuñ havāoñ kī jang meñ

'rāñjhā' maiñ 'ahd-e-nau kā qabīloñ meñ baT gayā

to 'hīr' ban ke pī na sakī zahr jhang meñ

garmā sakīñ na chāhateñ terā kaThor jism

har ek jal ke bujh ga.ī tasvīr sang meñ

aage 'musavvir' aag 'aqab meñ hai ye sadā

pīchhe na muḌ ke dekhnā is dasht-e-sañg meñ

baad-e-shimal chalne lagi ang ang mein

lipTa hai kaun mujh se ye patjhaD ke rang mein

KHwahish ke karobar se bachna muhaal hai

utrega tu bhi sath mere is surang mein

main aandhiyon mein hath bhi pakDun tera to kya

ek shaKH-e-be-siper hun hawaon ki jang mein

'ranjha' main 'ahd-e-nau ka qabilon mein baT gaya

to 'hir' ban ke pi na saki zahr jhang mein

garma sakin na chahaten tera kaThor jism

har ek jal ke bujh gai taswir sang mein

aage 'musawwir' aag 'aqab mein hai ye sada

pichhe na muD ke dekhna is dasht-e-sang mein