az-sar-e-nau fikr ka aaghaz karna chahiye

az-sar-e-nau fikr kā āġhāz karnā chāhiye

be-par-o-bāl sahī parvāz karnā chāhiye

sat.h par rahte haiñ un ko Dūbnā aatā nahīñ

kyuuñ na in tinkoñ ko sar-afrāz karnā chāhiye

qurb meñ duurī bahut hai bod meñ qurbat bahut

har tavālat ko atā ījāz karnā chāhiye

dil banā tā.ūs andeshe bane zaaġh o zaġhan

zehn ko ham-pāya-e-shahbāz karnā chāhiye

har adā māshūq kī bantī hai paimān-e-vafā

laġhzish-e-pā ko nazar-andāz karnā chāhiye

sher kī taḳhlīq 'kāvish' fel-e-jinsī to nahīñ

mānavī aulād par hī naaz karnā chāhiye

az-sar-e-nau fikr ka aaghaz karna chahiye

be-par-o-baal sahi parwaz karna chahiye

sath par rahte hain un ko Dubna aata nahin

kyun na in tinkon ko sar-afraaz karna chahiye

qurb mein duri bahut hai bod mein qurbat bahut

har tawalat ko ata ijaz karna chahiye

dil bana taus andeshe bane zagh o zaghan

zehn ko ham-paya-e-shahbaz karna chahiye

har ada mashuq ki banti hai paiman-e-wafa

laghzish-e-pa ko nazar-andaz karna chahiye

sher ki taKHliq 'kawish' fel-e-jinsi to nahin

manawi aulad par hi naz karna chahiye