malal is ka nahin dagh-e-ziyan aaya to kya hoga

malāl is kā nahīñ dāġh-e-ziyāñ aayā to kyā hogā

agar ā.īna-e-dil par nishāñ aayā to kyā hogā

namāz-e-sub.h hai sajda hai aur mastī kā 'ālam hai

tasavvur meñ tumhārā āstāñ aayā to kyā hogā

zamāna jāñ-nisāroñ se kabhī ḳhālī nahīñ hotā

koī ḳhālid sā phir mard-e-javāñ aayā to kyā hogā

mirī majbūriyāñ baḌhne nahīñ detī haiñ qadmoñ ko

magar paiġhām-e-mīr-e-kārvāñ aayā to kyā hogā

abhī shīrāz zinda hai abhī baġhdād baaqī hai

kahīñ phir se giroh-e-‘āshiqāñ aayā to kyā hogā

bahut pahle ḳhabar de dī hai jis kī mere aaqā ne

vahī sho'la qarīb-e-āshiyāñ aayā to kyā hogā

'ajab 'ālam hai mastī kā abhī se mast-o-be-ḳhud haiñ

mirā rāhat-rasāñ pīr-e-muġhāñ aayā to kyā hogā

ḳhabar merī mohabbat kī nahīñ hai ahl-e-gulshan ko

mirī sāñsoñ meñ vo ‘ambar-fashāñ aayā to kyā hogā

'qamar' ġhurbat-kada mere liye to Thiik hai lekin

mirā rashk-e-zamīn-o-āsmāñ aayā to kyā hogā

malal is ka nahin dagh-e-ziyan aaya to kya hoga

agar aaina-e-dil par nishan aaya to kya hoga

namaz-e-subh hai sajda hai aur masti ka 'alam hai

tasawwur mein tumhaara aastan aaya to kya hoga

zamana jaan-nisaron se kabhi KHali nahin hota

koi KHalid sa phir mard-e-jawan aaya to kya hoga

meri majburiyan baDhne nahin deti hain qadmon ko

magar paigham-e-mir-e-karwan aaya to kya hoga

abhi shiraaz zinda hai abhi baghdad baqi hai

kahin phir se giroh-e-‘ashiqan aaya to kya hoga

bahut pahle KHabar de di hai jis ki mere aaqa ne

wahi sho'la qarib-e-ashiyan aaya to kya hoga

'ajab 'alam hai masti ka abhi se mast-o-be-KHud hain

mera rahat-rasan pir-e-mughan aaya to kya hoga

KHabar meri mohabbat ki nahin hai ahl-e-gulshan ko

meri sanson mein wo ‘ambar-fashan aaya to kya hoga

'qamar' ghurbat-kada mere liye to Thik hai lekin

mera rashk-e-zamin-o-asman aaya to kya hoga