gar dekhiye to mazhar-e-asar-e-baqa hun

gar dekhiye to maz.har-e-āsār-e-baqā huuñ

aur samjhiye juuñ 'aks mujhe mahv-e-fanā huuñ

kartā huuñ pas-az-marg bhī hal mushkil-e-'ālam

behis huuñ pe nāḳhun kī tarah 'uqda-kushā huuñ

mamnūn mire faiz ke sab ahl-e-nazar haiñ

juuñ nuur har ik chashm kā dīdār-numā huuñ

hai maz.har-e-anvār-e-safā merī kudūrat

har-chand ki aahan huuñ par ā.īna banā huuñ

ahvāl-e-do-'ālam hai mire dil pe huvaidā

samjhā nahīñ tā-hāl par apne ta.iiñ kyā huuñ

āvāz nahīñ qaid meñ zanjīr kī hargiz

har chand ki 'ālam meñ huuñ 'ālam se judā huuñ

huuñ qāfila-sālār-e-tarīq-e-qudamā 'dard'

juuñ naqsh-e-qadam ḳhalq ko maiñ rāh-numā huuñ

gar dekhiye to mazhar-e-asar-e-baqa hun

aur samjhiye jun 'aks mujhe mahw-e-fana hun

karta hun pas-az-marg bhi hal mushkil-e-'alam

behis hun pe naKHun ki tarah 'uqda-kusha hun

mamnun mere faiz ke sab ahl-e-nazar hain

jun nur har ek chashm ka didar-numa hun

hai mazhar-e-anwar-e-safa meri kudurat

har-chand ki aahan hun par aaina bana hun

ahwal-e-do-'alam hai mere dil pe huwaida

samjha nahin ta-haal par apne tain kya hun

aawaz nahin qaid mein zanjir ki hargiz

har chand ki 'alam mein hun 'alam se juda hun

hun qafila-salar-e-tariq-e-qudama 'dard'

jun naqsh-e-qadam KHalq ko main rah-numa hun