ahd-e-hazir ek machine aur us ka karinda hun main

ahd-e-hāzir ik machine aur us kā kārinda huuñ maiñ

reza reza ruuh merī hai magar zinda huuñ maiñ

maiñ huuñ vo lamha jo muTThī meñ samā saktā nahīñ

pal meñ huuñ imroz-o-māzī pal meñ ā.inda huuñ maiñ

vo jo mujh ko pheñk aa.e bheḌiyoñ ke sāmne

kyā gila-shikva ki un se aap sharminda huuñ maiñ

mere lafzoñ meñ agar tāb-o-tavānā.ī nahīñ

ai ḳhudā kyuuñ dahr meñ terā numā.inda huuñ maiñ

maiñ jo kahtā huuñ samajhtā hī nahīñ koī use

jaise malbe meñ dabī bastī kā bāshinda huuñ maiñ

mere chehre par munaqqash is tarah tārīḳh hai

jaise ik kohna ajā.ib ghar kā bāshinda huuñ maiñ

ḳhaak huuñ lekin sarāpā nuur hai merā vajūd

is zamīñ par chāñd sūraj kā numā.inda huuñ maiñ

is jahāñ meñ maiñ hī masjūd-e-malā.ik thā 'sadīd'

is jahāñ meñ aaj ke insāñ se sharminda huuñ maiñ

ahd-e-hazir ek machine aur us ka karinda hun main

reza reza ruh meri hai magar zinda hun main

main hun wo lamha jo muTThi mein sama sakta nahin

pal mein hun imroz-o-mazi pal mein aainda hun main

wo jo mujh ko phenk aae bheDiyon ke samne

kya gila-shikwa ki un se aap sharminda hun main

mere lafzon mein agar tab-o-tawanai nahin

ai KHuda kyun dahr mein tera numainda hun main

main jo kahta hun samajhta hi nahin koi use

jaise malbe mein dabi basti ka bashinda hun main

mere chehre par munaqqash is tarah tariKH hai

jaise ek kohna ajaib ghar ka bashinda hun main

KHak hun lekin sarapa nur hai mera wajud

is zamin par chand suraj ka numainda hun main

is jahan mein main hi masjud-e-malaik tha 'sadid'

is jahan mein aaj ke insan se sharminda hun main