agarche zehn ke kashkol se chhalak rahe the

agarche zehn ke kashkol se chhalak rahe the

ḳhayāl sher meñ Dhalte hue jhijak rahe the

koī javāb na sūraj meñ thā na chāñd ke paas

mire savāl sar-e-āsmāñ chamak rahe the

na jaane kis ke qadam chūmne kī hasrat meñ

tamām rāste dil kī tarah dhaḌak rahe the

kisī se zehn jo miltā to guftugū karte

hujūm-e-shahr meñ tanhā the ham, bhaTak rahe the

ye us ne dekhā thā ik raqs-e-nā-tamām ke ba.ad

vufūr-e-shauq meñ kaun-o-makāñ thirak rahe the

kitāb-e-umr-e-guzishta ke hāshiyoñ meñ 'nabīl'

vo shor thā ki zamīñ āsmāñ dhamak rahe the

agarche zehn ke kashkol se chhalak rahe the

KHayal sher mein Dhalte hue jhijak rahe the

koi jawab na suraj mein tha na chand ke pas

mere sawal sar-e-asman chamak rahe the

na jaane kis ke qadam chumne ki hasrat mein

tamam raste dil ki tarah dhaDak rahe the

kisi se zehn jo milta to guftugu karte

hujum-e-shahr mein tanha the ham, bhaTak rahe the

ye us ne dekha tha ek raqs-e-na-tamam ke baad

wufur-e-shauq mein kaun-o-makan thirak rahe the

kitab-e-umr-e-guzishta ke hashiyon mein 'nabil'

wo shor tha ki zamin aasman dhamak rahe the