abhi jo gardish-e-ayyam se mila hun main

abhī jo gardish-e-ayyām se milā huuñ maiñ

samajh rahī thī kisī kaam se milā huuñ maiñ

shikast-e-shab tirī taqrīb se zarā pahle

diye jalātī huī shaam se milā huuñ maiñ

ajal se pahle bhī miltā rahā huuñ par ab ke

baḌe sukūñ baḌe ārām se milā huuñ maiñ

tirī qabā kī mahak har taraf numāyāñ thī

havā-e-vādī-e-gul-fām se milā huuñ maiñ

maiñ jāntā huuñ makīnoñ kī ḳhāmushī kā sabab

makāñ se pahle dar-o-bām se milā huuñ maiñ

'salīm' naam batāyā thā ġhāliban us ne

kal ek shā.er-e-gum-nām se milā huuñ maiñ

abhi jo gardish-e-ayyam se mila hun main

samajh rahi thi kisi kaam se mila hun main

shikast-e-shab teri taqrib se zara pahle

diye jalati hui sham se mila hun main

ajal se pahle bhi milta raha hun par ab ke

baDe sukun baDe aaram se mila hun main

teri qaba ki mahak har taraf numayan thi

hawa-e-wadi-e-gul-fam se mila hun main

main jaanta hun makinon ki KHamushi ka sabab

makan se pahle dar-o-baam se mila hun main

'salim' nam bataya tha ghaaliban us ne

kal ek shaer-e-gum-nam se mila hun main