ab to nahin aasra kisi ka
ab to nahīñ aasrā kisī kā
allāh hai apnī bekasī kā
o aañkh badal ke jaane vaale
kuchh dhyān kisī kī ājizī kā
bīmār ko dījiye tasallī
ye vaqt nahīñ jalī-kaTī kā
aapas meñ huī jo bad-gumānī
mushkil hai nibāh dostī kā
bālīñ se koī uThā ye kah kar
anjām ba-ḳhair ho kisī kā
ġham kā bhī qayām kuchh na Thahrā
ronā kyā roiye ḳhushī kā
pahuñchā hī diyā kisī galī tak
allāh-re zor be-ḳhudī kā
āḳhir ko sharāb rañg laa.ī
chhuptā nahīñ raaz mai-kashī kā
añdherā 'hafīz' ho rahā hai
bujhtā hai charāġh zindagī kā
ab to nahin aasra kisi ka
allah hai apni bekasi ka
o aankh badal ke jaane wale
kuchh dhyan kisi ki aajizi ka
bimar ko dijiye tasalli
ye waqt nahin jali-kaTi ka
aapas mein hui jo bad-gumani
mushkil hai nibah dosti ka
baalin se koi uTha ye kah kar
anjam ba-KHair ho kisi ka
gham ka bhi qayam kuchh na Thahra
rona kya roiye KHushi ka
pahuncha hi diya kisi gali tak
allah-re zor be-KHudi ka
aaKHir ko sharab rang lai
chhupta nahin raaz mai-kashi ka
andhera 'hafiz' ho raha hai
bujhta hai charagh zindagi ka
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
