ab mulaqat kahan shishe se paimane se

ab mulāqāt kahāñ shīshe se paimāne se

fātiha paḌh ke chale aa.e haiñ mai-ḳhāne se

kyā kareñ jām-o-subū haath pakaḌ lete haiñ

jī to kahtā hai ki uTh jā.iye mai-ḳhāne se

phūñk kar ham ne har ik gaam pe rakkhā hai qadam

āsmāñ phir bhī na baaz aayā sitam Dhāne se

ham ko jab aap bulāte haiñ chale aate haiñ

aap bhī to kabhī aa jā.iye bulvāne se

are o va.ada-farāmosh pahāḌ aisī raat

kyā kahūñ kaise kaTī tere nahīñ aane se

yaad rakh! vaqt ke andāz nahīñ badleñge

are allāh ke bande tire ghabrāne se

sar chaḌhā.eñ kabhī āñkhoñ se lagā.eñ saaqī

tere hāthoñ kī chhalak jaa.e jo paimāne se

ḳhālī rakkhī huī botal ye patā detī hai

ki abhī uTh ke gayā hai koī mai-ḳhāne se

aa.egī hashr kī nāseh kī samajh meñ kyā ḳhaak

jab samajhdār samajhte nahīñ samjhāne se

barq ke Dar se kaleje se lagā.e hue hai

chaar tinke jo uThā laa.ī hai vīrāne se

dil zarā bhī na pasījā but-e-kāfir terā

ka.aba allāh kā ghar ban gayā but-ḳhāne se

sham.a bechārī jo ik mūnis-e-tanhā.ī thī

bujh ga.ī vo bhī sar-e-shām havā aane se

ġhair kaahe ko suneñge tirā dukhḌā 'bismil'

un ko fursat kahāñ hai apnī ġhazal gaane se

ab mulaqat kahan shishe se paimane se

fatiha paDh ke chale aae hain mai-KHane se

kya karen jam-o-subu hath pakaD lete hain

ji to kahta hai ki uTh jaiye mai-KHane se

phunk kar hum ne har ek gam pe rakkha hai qadam

aasman phir bhi na baz aaya sitam Dhane se

hum ko jab aap bulate hain chale aate hain

aap bhi to kabhi aa jaiye bulwane se

are o wada-faramosh pahaD aisi raat

kya kahun kaise kaTi tere nahin aane se

yaad rakh! waqt ke andaz nahin badlenge

are allah ke bande tere ghabrane se

sar chaDhaen kabhi aankhon se lagaen saqi

tere hathon ki chhalak jae jo paimane se

KHali rakkhi hui botal ye pata deti hai

ki abhi uTh ke gaya hai koi mai-KHane se

aaegi hashr ki naseh ki samajh mein kya KHak

jab samajhdar samajhte nahin samjhane se

barq ke Dar se kaleje se lagae hue hai

chaar tinke jo uTha lai hai virane se

dil zara bhi na pasija but-e-kafir tera

kaba allah ka ghar ban gaya but-KHane se

shama bechaari jo ek munis-e-tanhai thi

bujh gai wo bhi sar-e-sham hawa aane se

ghair kahe ko sunenge tera dukhDa 'bismil'

un ko fursat kahan hai apni ghazal gane se