ab is sada kahani ko naya ek moD dena tha

ab is saada kahānī ko nayā ik moḌ denā thā

zarā sī baat par ahd-e-vafā hī toḌ denā thā

mahaktā thā badan har vaqt jis ke lams-e-ḳhush-bū se

vahī gul-dasta dahlīz-e-ḳhizāñ par chhoḌ denā thā

shikast-e-sāz-e-dil kā umr bhar mātam bhī kyā karte

ki ik din hañste hañste sāz-e-jāñ hī toḌ denā thā

safar meñ har qadam rah rah ke ye taklīf hī dete

bahar-sūrat hameñ in ābloñ ko phoḌ denā thā

ġhalat-fahmī ke jhoñkoñ se bikhar kar rah ga.e āḳhir

lahū kī aañch meñ TuuTe diloñ ko joḌ denā thā

vo jis pe zikr hai qaul-o-qasam aur ahd-o-paimāñ kā

kitāb-e-zindagī ke is varaq ko moḌ denā thā

banāyā hī nahīñ ham ne kabhī ye soch kar 'anjum'

ki gautam kī tarah ik din hameñ ghar chhoḌ denā thā

ab is sada kahani ko naya ek moD dena tha

zara si baat par ahd-e-wafa hi toD dena tha

mahakta tha badan har waqt jis ke lams-e-KHush-bu se

wahi gul-dasta dahliz-e-KHizan par chhoD dena tha

shikast-e-saz-e-dil ka umr bhar matam bhi kya karte

ki ek din hanste hanste saz-e-jaan hi toD dena tha

safar mein har qadam rah rah ke ye taklif hi dete

bahar-surat hamein in aablon ko phoD dena tha

ghalat-fahmi ke jhonkon se bikhar kar rah gae aaKHir

lahu ki aanch mein TuTe dilon ko joD dena tha

wo jis pe zikr hai qaul-o-qasam aur ahd-o-paiman ka

kitab-e-zindagi ke is waraq ko moD dena tha

banaya hi nahin hum ne kabhi ye soch kar 'anjum'

ki gautam ki tarah ek din hamein ghar chhoD dena tha