aatish-e-mina nazar aai harifana mujhe

ātish-e-mīnā nazar aa.ī harīfāna mujhe

ik taġhayyur kī ḳhabar detā hai paimāna mujhe

tishna-e-nāzuk mizājān-e-kanisht-o-dair kā

barhaman kahne bhī de ek-ādh afsāna mujhe

kis qadar hairat-asar niklī hai marg-e-andalīb

is sipās-e-jāñ se gul lagtā hai begāna mujhe

ik ḳhayāl-e-zulf-e-jānāñ ik havā-e-pech-pech

ik na ik zanjīr-e-sar rakhtī hai dīvāna mujhe

bosa-e-jānāñ meñ thī yuuñ to had-e-shukr-o-sipās

chāhiye ik larzish-e-lab bhī raqībāna mujhe

us ke paikar kī jhalak rāhoñ pe thī nazdīk o duur

kal ġhurūb-e-mahr thā ik ā.īna-ḳhāna mujhe

shahr jin ke naam se zinda thā vo sab uTh ga.e

ik ishāre se talab kartā hai vīrāna mujhe

aatish-e-mina nazar aai harifana mujhe

ek taghayyur ki KHabar deta hai paimana mujhe

tishna-e-nazuk mizajaan-e-kanisht-o-dair ka

barhaman kahne bhi de ek-adh afsana mujhe

kis qadar hairat-asar nikli hai marg-e-andalib

is sipas-e-jaan se gul lagta hai begana mujhe

ek KHayal-e-zulf-e-jaanan ek hawa-e-pech-pech

ek na ek zanjir-e-sar rakhti hai diwana mujhe

bosa-e-jaanan mein thi yun to had-e-shukr-o-sipas

chahiye ek larzish-e-lab bhi raqibana mujhe

us ke paikar ki jhalak rahon pe thi nazdik o dur

kal ghurub-e-mahr tha ek aaina-KHana mujhe

shahr jin ke nam se zinda tha wo sab uTh gae

ek ishaare se talab karta hai virana mujhe