aarzu bhi to kar nahin aati

aarzū bhī to kar nahīñ aatī

dil meñ hai hoñTh par nahīñ aatī

vasl kī raat ke sivā koī shaam

saath le kar sahar nahīñ aatī

chalī jaatī hai un ke ghar mirī niiñd

jā ke phir rāt-bhar nahīñ aatī

vo mujhe koste haiñ o tāsīr

arsh se tū utar nahīñ aatī

pahle aatī thī ai qafas vaalo

ab sabā bhī idhar nahīñ aatī

chup khaḌe haiñ vo pesh-e-dāvar-e-hashr

bhūle haiñ baat kar nahīñ aatī

kabhī aa jaatī thī muqaddar par

ab hañsī hoñTh par nahīñ aatī

are vaa.iz Darā na tū itnā

kyā use darguzar nahīñ aatī

jab tak aa.e na koī chāñd sī shakl

shab-e-mah mere ghar nahīñ aatī

hashr ke din bhī daaġh dāman meñ

sharm ai chashm-e-tar nahīñ aatī

kamar in kī bahut hī nāzuk hai

zulf bhī tā-kamar nahīñ aatī

ġham haiñ rāh-e-junūñ meñ ahl-e-junūñ

haiñ magar kuchh ḳhabar nahīñ aatī

aap ko apnī aarsī ke sivā

achchhī sūrat nazar nahīñ aatī

sharm aatī hai dil meñ sau sau baar

tauba lab par magar nahīñ aatī

vā-e-qismat ki bekasī bhī 'riyāz'

ab mirī qabr par nahīñ aatī

aarzu bhi to kar nahin aati

dil mein hai honTh par nahin aati

wasl ki raat ke siwa koi sham

sath le kar sahar nahin aati

chali jati hai un ke ghar meri nind

ja ke phir raat-bhar nahin aati

wo mujhe koste hain o tasir

arsh se tu utar nahin aati

pahle aati thi ai qafas walo

ab saba bhi idhar nahin aati

chup khaDe hain wo pesh-e-dawar-e-hashr

bhule hain baat kar nahin aati

kabhi aa jati thi muqaddar par

ab hansi honTh par nahin aati

are waiz Dara na tu itna

kya use darguzar nahin aati

jab tak aae na koi chand si shakl

shab-e-mah mere ghar nahin aati

hashr ke din bhi dagh daman mein

sharm ai chashm-e-tar nahin aati

kamar in ki bahut hi nazuk hai

zulf bhi ta-kamar nahin aati

gham hain rah-e-junun mein ahl-e-junun

hain magar kuchh KHabar nahin aati

aap ko apni aarsi ke siwa

achchhi surat nazar nahin aati

sharm aati hai dil mein sau sau bar

tauba lab par magar nahin aati

wa-e-qismat ki bekasi bhi 'riyaz'

ab meri qabr par nahin aati