palkon pe jo nami thi bahai na ja saki

palkoñ pe jo namī thī bahā.ī na jā sakī

ik aag sī lagī thī bujhā.ī na jā sakī

rang-e-jamāl merā agarche vo le uḌiiñ

par titliyoñ se ḳhushbū churā.ī na jā sakī

thī dīdanī chaman meñ vo phūloñ kī bebasī

makkhī jo tan pe baiThī uḌaa.ī na jā sakī

milne ke baa'd us se rahā dil meñ ye malāl

aañkh is daf'a bhī us se milā.ī na jā sakī

us nā-samajh ko koshishoñ ke bā-vajūd bhī

āñkhoñ se dil kī baat batā.ī na jā sakī

maġhlūb-e-mauj-e-dariyā rahī kashtī-e-hayāt

marzī se apnī samt chalā.ī na jā sakī

palkon pe jo nami thi bahai na ja saki

ek aag si lagi thi bujhai na ja saki

rang-e-jamal mera agarche wo le uDin

par titliyon se KHushbu churai na ja saki

thi didani chaman mein wo phulon ki bebasi

makkhi jo tan pe baiThi uDai na ja saki

milne ke ba'd us se raha dil mein ye malal

aankh is daf'a bhi us se milai na ja saki

us na-samajh ko koshishon ke ba-wajud bhi

aankhon se dil ki baat batai na ja saki

maghlub-e-mauj-e-dariya rahi kashti-e-hayat

marzi se apni samt chalai na ja saki