bahaar apna dast-e-karam jab baDhae

bahār apnā dast-e-karam jab baḌhā.e

na-jāne mujhe kyuuñ ḳhizāñ yaad aa.e

kahāñ tak koī rāz-e-ulfat chhupā.e

jo aahoñ ko rokā to aañsū bhar aa.e

kuchh aise maqām-e-mohabbat bhī aa.e

ki dil ro diyā aur ham muskurā.e

na pūchh ek ashk-e-mohabbat kā mātam

sitāre baḌī der tak jhilmilā.e

mohabbat kī nairangiyāñ tauba tauba

koī ashk pī le koī muskurā.e

rah-e-'ishq ke pech-o-ḳham allah allāh

ye jī chāhtā hai ki manzil na aa.e

un āñkhoñ kī mastī kā 'ālam na pūchho

tasavvur se aksar qadam laḌkhaḌā.e

baḌī chiiz hai us kī gum-karda-rāhī

jo manzil pe ho aur manzil na paa.e

ga.iiñ un ke jalvoñ ke ham-rāh nazreñ

simaTte ga.e dhuup ke saath saa.e

tirī rah-guzar meñ musāfir to kyā haiñ

yahāñ zindagī rāsta bhuul jaa.e

bahaar apna dast-e-karam jab baDhae

na-jaane mujhe kyun KHizan yaad aae

kahan tak koi raaz-e-ulfat chhupae

jo aahon ko roka to aansu bhar aae

kuchh aise maqam-e-mohabbat bhi aae

ki dil ro diya aur hum muskurae

na puchh ek ashk-e-mohabbat ka matam

sitare baDi der tak jhilmilae

mohabbat ki nairangiyan tauba tauba

koi ashk pi le koi muskurae

rah-e-'ishq ke pech-o-KHam allah allah

ye ji chahta hai ki manzil na aae

un aankhon ki masti ka 'alam na puchho

tasawwur se aksar qadam laDkhaDae

baDi chiz hai us ki gum-karda-rahi

jo manzil pe ho aur manzil na pae

gain un ke jalwon ke ham-rah nazren

simaTte gae dhup ke sath sae

teri rah-guzar mein musafir to kya hain

yahan zindagi rasta bhul jae