aankhon mein rup subh ki pahli kiran sa hai

āñkhoñ meñ ruup sub.h kī pahlī kiran sā hai

ahvāl jī kā zulf-e-shikan-dar-shikan sā hai

kuchh yādgār apnī magar chhoḌ kar ga.iiñ

jaatī rutoñ kā haal diloñ kī lagan sā hai

āñkheñ baras ga.iiñ to nikhār aur aa gayā

yādoñ kā rañg bhī to gul-o-yāsman sā hai

kis moḌ par haiñ aaj ham ai rahguzār-e-nāz

ab dard kā mizāj kisī ham-suḳhan sā hai

hai ab bhī rañg rañg-e-tamannā kā pairahan

ḳhvāboñ ke saath ab bhī vahī husn-e-zan sā hai

kin manziloñ luTe haiñ mohabbat ke qāfile

insāñ zamīñ pe aaj ġharīb-ul-vatan sā hai

vo jis kā saath chhoḌ chukā nāz-e-āgahī

ab bhī talāsh-e-rah meñ vahī rāhzan sā hai

shāḳhoñ kā rañg-rūp ḳhizāñ le ga.ī magar

andāz aaj bhī vahī arbāb-e-fan sā hai

ḳhushbū ke thāmne ko baḌhā.e haiñ haath 'adā'

dāmān-e-ārzū bhī sabā-pairahan sā hai

aankhon mein rup subh ki pahli kiran sa hai

ahwal ji ka zulf-e-shikan-dar-shikan sa hai

kuchh yaadgar apni magar chhoD kar gain

jati ruton ka haal dilon ki lagan sa hai

aankhen baras gain to nikhaar aur aa gaya

yaadon ka rang bhi to gul-o-yasman sa hai

kis moD par hain aaj hum ai rahguzar-e-naz

ab dard ka mizaj kisi ham-suKHan sa hai

hai ab bhi rang rang-e-tamanna ka pairahan

KHwabon ke sath ab bhi wahi husn-e-zan sa hai

kin manzilon luTe hain mohabbat ke qafile

insan zamin pe aaj gharib-ul-watan sa hai

wo jis ka sath chhoD chuka naz-e-agahi

ab bhi talash-e-rah mein wahi rahzan sa hai

shaKHon ka rang-rup KHizan le gai magar

andaz aaj bhi wahi arbab-e-fan sa hai

KHushbu ke thamne ko baDhae hain hath 'ada'

daman-e-arzu bhi saba-pairahan sa hai