aankhon mein na zulfon mein na ruKHsar mein dekhen

āñkhoñ meñ na zulfoñ meñ na ruḳhsār meñ dekheñ

mujh ko mirī dānish mire afkār meñ dekheñ

malbūs badan dekheñ haiñ rañgīn qabā meñ

ab pairahan-e-zāt ko iz.hār meñ dekheñ

sau rañg mazāmīn haiñ jab likhne pe aa.uuñ

gul-dasta-e-ma.anī mire ash.ār meñ dekheñ

puurī na adhūrī huuñ na kam-tar huuñ na bartar

insān huuñ insān ke me.aar meñ dekheñ

rakkhe haiñ qadam maiñ ne bhī tāroñ kī zamīñ par

pīchhe huuñ kahāñ aap se raftār meñ dekheñ

mansūb haiñ insān se jitne bhī fazā.el

apne hī nahīñ mere bhī atvār meñ dekheñ

kab chāhā ki sāmān-e-tijārat hameñ samjheñ

laa.e the hameñ aap hī bāzār meñ dekheñ

us qādir-e-mutlaq ne banāyā hai hameñ bhī

ta.amīr kī ḳhūbī usī me.amār meñ dekheñ

aankhon mein na zulfon mein na ruKHsar mein dekhen

mujh ko meri danish mere afkar mein dekhen

malbus badan dekhen hain rangin qaba mein

ab pairahan-e-zat ko izhaar mein dekhen

sau rang mazamin hain jab likhne pe aaun

gul-dasta-e-mani mere ashaar mein dekhen

puri na adhuri hun na kam-tar hun na bartar

insan hun insan ke mear mein dekhen

rakkhe hain qadam main ne bhi taron ki zamin par

pichhe hun kahan aap se raftar mein dekhen

mansub hain insan se jitne bhi fazael

apne hi nahin mere bhi atwar mein dekhen

kab chaha ki saman-e-tijarat hamein samjhen

lae the hamein aap hi bazar mein dekhen

us qadir-e-mutlaq ne banaya hai hamein bhi

tamir ki KHubi usi meamar mein dekhen