aaj phir us dil-nashin par aa gaya hai

aaj phir us dil-nashīñ par aa gayā hai

dil jahāñ thā phir vahīñ par aa gayā hai

ek shahzāde ḳhudā ke āsare par

kūfiyoñ kī sarzamīñ par aa gayā hai

sar nigūñ jab se kiyā hai tere aage

āsmāñ merī jabīñ par aa gayā hai

vo jo kal tak haañ meñ haañ kartā thā merī

aaj to vo bhī nahīñ par aa gayā hai

ḳhvāb meñ iblīs ne aa kar batāyā

aadmī aadam ke diiñ par aa gayā hai

tujh se pahle bhī makāñ ḳhālī nahīñ thā

tū magar is ke makīñ par aa gayā hai

mujh se 'momin' kā pata kyā pūchhte ho

aañkh kholo vo yahīñ par aa gayā hai

aaj phir us dil-nashin par aa gaya hai

dil jahan tha phir wahin par aa gaya hai

ek shahzade KHuda ke aasare par

kufiyon ki sarzamin par aa gaya hai

sar nigun jab se kiya hai tere aage

aasman meri jabin par aa gaya hai

wo jo kal tak han mein han karta tha meri

aaj to wo bhi nahin par aa gaya hai

KHwab mein iblis ne aa kar bataya

aadmi aadam ke din par aa gaya hai

tujh se pahle bhi makan KHali nahin tha

tu magar is ke makin par aa gaya hai

mujh se 'momin' ka pata kya puchhte ho

aankh kholo wo yahin par aa gaya hai