aaj aaine mein jo kuchh bhi nazar aata hai

aaj ā.īne meñ jo kuchh bhī nazar aatā hai

us ke hone pe yaqīñ bār-e-digar aatā hai

zehn o dil kartā huuñ jab ranj-e-jahāñ se ḳhālī

koī be-tarah mirī ruuh meñ dar aatā hai

guftugū karte hue jaate haiñ phūloñ ke giroh

aur chupke se daraḳhtoñ pe samar aatā hai

bach nikalne pe mire ḳhush nahīñ vo jān-e-bahār

koī ilzām mukarrar mire sar aatā hai

lauT jaane kī ijāzat nahīñ dūñgā us ko

koī ab mere ta'āqub meñ agar aatā hai

merī āñkheñ bhī mayassar nahīñ ātīñ mujh ko

jab mulāqāt ko vo ḳhvāb-e-sahar aatā hai

merī qismat hai ye āvāra-ḳhirāmī 'sājid'

dasht ko raah nikaltī hai na ghar aatā hai

aaj aaine mein jo kuchh bhi nazar aata hai

us ke hone pe yaqin bar-e-digar aata hai

zehn o dil karta hun jab ranj-e-jahan se KHali

koi be-tarah meri ruh mein dar aata hai

guftugu karte hue jate hain phulon ke giroh

aur chupke se daraKHton pe samar aata hai

bach nikalne pe mere KHush nahin wo jaan-e-bahaar

koi ilzam mukarrar mere sar aata hai

lauT jaane ki ijazat nahin dunga us ko

koi ab mere ta'aqub mein agar aata hai

meri aankhen bhi mayassar nahin aatin mujh ko

jab mulaqat ko wo KHwab-e-sahar aata hai

meri qismat hai ye aawara-KHirami 'sajid'

dasht ko rah nikalti hai na ghar aata hai