main jab bhi akeli hoti hun tum chupke se aa jate ho

maiñ jab bhī akelī hotī huuñ tum chupke se aa jaate ho

aur jhāñk ke merī āñkhoñ meñ biite din yaad dilāte ho

mastāna havā ke jhoñkoñ se har baar vo parde kā hilnā

parde ko pakaḌne kī dhun meñ do ajnabī hāthoñ kā milnā

āñkhoñ meñ dhuāñ sā chhā jaanā sāñsoñ meñ sitāre se khulnā

raste meñ tumhārā muḌ muḌ kar taknā vo mujhe jaate jaate

aur merā ThiThak kar ruk jaanā chilman ke qarīb aate aate

nazroñ kā taras kar rah jaanā ik aur jhalak paate paate

bāloñ ko sukhāne kī ḳhātir koThe pe vo merā aa jaanā

aur tum ko muqābil paate hī kuchh sharmānā kuchh bal khānā

ham-sāyoñ ke Dar se katrānā ghar vāloñ ke Dar se ghabrānā

ro ro ke tumheñ ḳhat likhtī huuñ aur ḳhud paḌh kar ro letī huuñ

hālāt ke tapte tūfāñ meñ jazbāt kī kashtī khetī huuñ

kaise ho kahāñ ho kuchh to kaho maiñ tum ko sadā.eñ detī huuñ

maiñ jab bhī akelī hotī huuñ tum chupke se aa jaate ho

aur jhāñk ke merī āñkhoñ meñ biite din yaad dilāte ho

main jab bhi akeli hoti hun tum chupke se aa jate ho

aur jhank ke meri aankhon mein bite din yaad dilate ho

mastana hawa ke jhonkon se har bar wo parde ka hilna

parde ko pakaDne ki dhun mein do ajnabi hathon ka milna

aankhon mein dhuan sa chha jaana sanson mein sitare se khulna

raste mein tumhaara muD muD kar takna wo mujhe jate jate

aur mera ThiThak kar ruk jaana chilman ke qarib aate aate

nazron ka taras kar rah jaana ek aur jhalak pate pate

baalon ko sukhane ki KHatir koThe pe wo mera aa jaana

aur tum ko muqabil pate hi kuchh sharmana kuchh bal khana

ham-sayon ke Dar se katrana ghar walon ke Dar se ghabrana

ro ro ke tumhein KHat likhti hun aur KHud paDh kar ro leti hun

haalat ke tapte tufan mein jazbaat ki kashti kheti hun

kaise ho kahan ho kuchh to kaho main tum ko sadaen deti hun

main jab bhi akeli hoti hun tum chupke se aa jate ho

aur jhank ke meri aankhon mein bite din yaad dilate ho