zar-e-sarishk faza mein uchhaalta hua main

zar-e-sarishk fazā meñ uchhāltā huā maiñ

bikhar chalā huuñ ḳhushī ko sambhāltā huā maiñ

abhī to pahle paroñ kā bhī qarz hai mujh par

jhijak rahā huuñ na.e par nikāltā huā maiñ

kisī jazīra-e-pur-amn kī talāsh meñ huuñ

ḳhud apnī raakh samundar meñ Dāltā huā maiñ

phaloñ ke saath kahīñ ghoñsle na gir jaa.eñ

ḳhayāl rakhtā huuñ patthar uchhāltā huā maiñ

ye kis bulandī pe lā kar khaḌā kiyā hai mujhe

ki thak gayā huuñ tavāzun sambhāltā huā maiñ

vo aag phailī to sab kuchh siyāh raakh huā

ki so gayā thā badan ko ujāltā huā maiñ

bichhaḌ gayā huuñ ḳhud apne maqām se 'shāhid'

bhaTakne vāloñ ko raste pe Dāltā huā maiñ

zar-e-sarishk faza mein uchhaalta hua main

bikhar chala hun KHushi ko sambhaalta hua main

abhi to pahle paron ka bhi qarz hai mujh par

jhijak raha hun nae par nikalta hua main

kisi jazira-e-pur-amn ki talash mein hun

KHud apni rakh samundar mein Dalta hua main

phalon ke sath kahin ghonsle na gir jaen

KHayal rakhta hun patthar uchhaalta hua main

ye kis bulandi pe la kar khaDa kiya hai mujhe

ki thak gaya hun tawazun sambhaalta hua main

wo aag phaili to sab kuchh siyah rakh hua

ki so gaya tha badan ko ujalta hua main

bichhaD gaya hun KHud apne maqam se 'shahid'

bhaTakne walon ko raste pe Dalta hua main