zaKHmon ka ek silsila achchha nahin laga

zaḳhmoñ kā ek silsila achchhā nahīñ lagā

jarrāh ko ye tajraba achchhā nahīñ lagā

us ne kiyā salām to achchhā lagā magar

bas ye ki muñh kā zāviya achchhā nahīñ lagā

mere junūñ ko vasl kī qurbat nigal ga.ī

furqat se itnā fāsla achchhā nahīñ lagā

tum ne jo matn pesh kiyā mustanad to thā

lekin tumhārā hāshiya achchhā nahīñ lagā

ā.īna-gar ke haath meñ patthar haiñ kis liye

''shāyad unheñ bhī aa.ina achchhā nahīñ lagā''

dasht-e-junūñ se aa ga.e shahr-e-ḳhirad meñ ham

dil ko magar ye sāneha achchhā nahīñ lagā

'ḳhālid' sunā jo ruuh kā naġhma to phir kabhī

bulbul ko koī zamzama achchhā nahīñ lagā

zaKHmon ka ek silsila achchha nahin laga

jarrah ko ye tajraba achchha nahin laga

us ne kiya salam to achchha laga magar

bas ye ki munh ka zawiya achchha nahin laga

mere junun ko wasl ki qurbat nigal gai

furqat se itna fasla achchha nahin laga

tum ne jo matn pesh kiya mustanad to tha

lekin tumhaara hashiya achchha nahin laga

aaina-gar ke hath mein patthar hain kis liye

shayad unhen bhi aaina achchha nahin laga

dasht-e-junun se aa gae shahr-e-KHirad mein hum

dil ko magar ye saneha achchha nahin laga

'KHalid' suna jo ruh ka naghma to phir kabhi

bulbul ko koi zamzama achchha nahin laga