usne ek bar bhi puchha nahin kaisa hun main

us ne ik baar bhī pūchhā nahīñ kaisā huuñ maiñ

ḳhud ko bhī jis ke liye haar ke baiThā huuñ maiñ

phuul hone kī sazā ḳhuub milī hai mujh ko

shāḳh se TuuT ke gul-dān meñ rakkhā huuñ maiñ

chaltā rahtā huuñ to lagtā hai koī saath meñ hai

thak ke baiThūñgā to yaad aa.egā tanhā huuñ maiñ

gum huā ḳhud meñ to ik nuqta-e-mauhūm huā

munkashif hote hī atrāf pe chhāyā huuñ maiñ

is salīqe se mujhe qatl kiyā hai us ne

ab bhī duniyā ye samajhtī hai ki zinda huuñ maiñ

phir achānak ye huā jiit ga.ī ye duniyā

maiñ samajhtā thā ki bas jītne vaalā huuñ maiñ

vo bhī rasman yahī pūchhegā ki kaise ho tum

maiñ bhī hañste hue kah dūñgā ki achchhā huuñ maiñ

us ne ek bar bhi puchha nahin kaisa hun main

KHud ko bhi jis ke liye haar ke baiTha hun main

phul hone ki saza KHub mili hai mujh ko

shaKH se TuT ke gul-dan mein rakkha hun main

chalta rahta hun to lagta hai koi sath mein hai

thak ke baiThunga to yaad aaega tanha hun main

gum hua KHud mein to ek nuqta-e-mauhum hua

munkashif hote hi atraf pe chhaya hun main

is saliqe se mujhe qatl kiya hai us ne

ab bhi duniya ye samajhti hai ki zinda hun main

phir achanak ye hua jit gai ye duniya

main samajhta tha ki bas jitne wala hun main

wo bhi rasman yahi puchhega ki kaise ho tum

main bhi hanste hue kah dunga ki achchha hun main