tu apne pindar ki KHabar le ki ruKH hawa ka badal raha hai

tū apne pindār kī ḳhabar le ki ruḳh havā kā badal rahā hai

tirī nazar se bahakne vaalā fareb khā kar sañbhal rahā hai

yahī hai dastūr-e-shahr-e-hastī ki jo nayā hai vahī purānā

hayāt añgḌā.ī le rahī hai zamāna karvaT badal rahā hai

rah-e-talab meñ junūñ ne aksar shu'ūr ko ā.īna dikhāyā

jise thā uzr-e-shikasta-pā.ī vo ab sitāroñ pe chal rahā hai

hameñ ye tā'ne na do ki ham ne zamāna-sāzī ke gur na sīkhe

ki rafta rafta mizāj-e-duniyā hamāre sāñche meñ Dhal rahā hai

tirī adāoñ kī sādgī meñ kisī ko mahsūs bhī na hogā

abhī qayāmat kā ik karishma hayā ke dāman meñ pal rahā hai

kisī meñ himmat na thī ki baḌh kar junūñ kī zanjīr thaam letā

ḳhirad kī bastī meñ hai añdherā charāġh sahrā meñ jal rahā hai

hazār sheve the guftugū ke hazār andāz the suḳhan ke

magar ba-īmā-e-dil 'farīdī' fidā-e-rañg-e-ġhazal rahā hai

tu apne pindar ki KHabar le ki ruKH hawa ka badal raha hai

teri nazar se bahakne wala fareb kha kar sanbhal raha hai

yahi hai dastur-e-shahr-e-hasti ki jo naya hai wahi purana

hayat angDai le rahi hai zamana karwaT badal raha hai

rah-e-talab mein junun ne aksar shu'ur ko aaina dikhaya

jise tha uzr-e-shikasta-pai wo ab sitaron pe chal raha hai

hamein ye ta'ne na do ki hum ne zamana-sazi ke gur na sikhe

ki rafta rafta mizaj-e-duniya hamare sanche mein Dhal raha hai

teri adaon ki sadgi mein kisi ko mahsus bhi na hoga

abhi qayamat ka ek karishma haya ke daman mein pal raha hai

kisi mein himmat na thi ki baDh kar junun ki zanjir tham leta

KHirad ki basti mein hai andhera charagh sahra mein jal raha hai

hazar shewe the guftugu ke hazar andaz the suKHan ke

magar ba-ima-e-dil 'faridi' fida-e-rang-e-ghazal raha hai