tera KHulus-e-dil to mahall-e-nazar nahin

terā ḳhulūs-e-dil to mahall-e-nazar nahīñ

par kuchh to hai jo terī zabāñ meñ asar nahīñ

ab vo nahīñ hai jalva-e-sham-o-sahar kā rañg

terā jamāl shāmil-e-husn-e-nazar nahīñ

hai markaz-e-nigāh abhī tak vo āstāñ

ye aur baat hai ki majāl-e-safar nahīñ

uḌ bhī chaleñ to ab vo bahār-e-chaman kahāñ

haañ haañ nahīñ mujhe havas-e-bāl-o-par nahīñ

tark-e-ta.alluqāt ḳhud apnā qusūr thā

ab kyā gila ki un ko hamārī ḳhabar nahīñ

chup chaap sah rahe haiñ ki apnoñ kā jaur hai

ab ḳhuub jānte haiñ fuġhāñ kārgar nahīñ

kuchh hai to apnī zūd-yaqīnī se hai gila

tujh se to ab kalām bhī ai chārāgar nahīñ

tera KHulus-e-dil to mahall-e-nazar nahin

par kuchh to hai jo teri zaban mein asar nahin

ab wo nahin hai jalwa-e-sham-o-sahar ka rang

tera jamal shamil-e-husn-e-nazar nahin

hai markaz-e-nigah abhi tak wo aastan

ye aur baat hai ki majal-e-safar nahin

uD bhi chalen to ab wo bahaar-e-chaman kahan

han han nahin mujhe hawas-e-baal-o-par nahin

tark-e-talluqat KHud apna qusur tha

ab kya gila ki un ko hamari KHabar nahin

chup chap sah rahe hain ki apnon ka jaur hai

ab KHub jaante hain fughan kargar nahin

kuchh hai to apni zud-yaqini se hai gila

tujh se to ab kalam bhi ai chaaragar nahin