tamam aalam se moD kar munh main apne andar sama gaya hun

tamām aalam se moḌ kar muñh maiñ apne andar samā gayā huuñ

mujhe na āvāz de zamāne maiñ apnī āvāz sun rahā huuñ

tazād-e-hastī kā falsafa huuñ uruuj o pastī kā aa.inā huuñ

uThā huā ik ġhurūr-e-sar huuñ miTā huā ek naqsh-e-pā huuñ

ho kyā ta.ayyun mirī hadoñ kā shumār kyā merī vus.atoñ kā

hazāroñ aalam base haiñ mujh meñ maiñ behad-o-be-karāñ ḳhalā huuñ

azāb-e-ehsās-o-āgahī ke vo dil-shikan ḳhvāb-pāsh lamhe

hazār ā.īne TūTte haiñ maiñ jab bhī ā.īna dekhtā huuñ

maiñ nā-shunīda sadā-e-sahrā banūñgā āvāz-e-vaqt 'kaifī'

zabān-e-ālam pe ā.ūñgā kal maiñ aaj ik harf-e-nārsā huuñ

tamam aalam se moD kar munh main apne andar sama gaya hun

mujhe na aawaz de zamane main apni aawaz sun raha hun

tazad-e-hasti ka falsafa hun uruj o pasti ka aaina hun

uTha hua ek ghurur-e-sar hun miTa hua ek naqsh-e-pa hun

ho kya tayyun meri hadon ka shumar kya meri wusaton ka

hazaron aalam base hain mujh mein main behad-o-be-karan KHala hun

azab-e-ehsas-o-agahi ke wo dil-shikan KHwab-pash lamhe

hazar aaine TuTte hain main jab bhi aaina dekhta hun

main na-shunida sada-e-sahra banunga aawaz-e-waqt 'kaifi'

zaban-e-alam pe aaunga kal main aaj ek harf-e-narsa hun