tasir jazb maston ki har har ghazal mein hai

tāsīr jazb mastoñ kī har har ġhazal meñ hai

e'jāz baḌ meñ hai to karāmat zaTal meñ hai

dil meñ jo apne yaar hai to dil baġhal meñ hai

phir kyuuñ hai ġham ki sāhab-e-ḳhāna mahal meñ hai

kitnā ġhurūr hai tumheñ husn-o-jamāl par

go yād-e-yār-e-husn tumhāre 'amal meñ hai

hai yaad dil meñ panja-e-rañgīn-e-yār kī

mehñdī ke chor kā guzar apne mahal meñ hai

bad-tar ḳhizāñ se hai hameñ is baaġh kī bahār

boī nifāq phuul meñ hī zahr phal meñ hai

lete haiñ bose un lab-o-gesū ke rāt-din

mulk-e-yaman se tāḳhtan apne 'amal meñ hai

mun.im ye kār-ḳhāne haiñ duniyā ke kar na fikr

koī hai jhoñpaḌe meñ to koī mahal meñ hai

jo ban gayā vo pech magar un ke haiñ vahī

rassī kā bal huzūr kī zulfoñ ke bal meñ hai

pahlū meñ mujh hazīñ ke Tapaktā hai rāt-din

yārab ye dil hai yā koī phoḌā baġhal meñ hai

itnā lazīz bāġh-e-jahāñ meñ samar hai kaun

jo zā.iqa nihāl-e-tamannā ke phal meñ hai

hasrat hai ham bhī kahte kisī din ye ai falak

ai dil mubārak aaj to dilbar baġhal meñ hai

dushnām de ke bose ye kah kah ke dete haiñ

in'ām gāliyoñ ke ye nemul-badal meñ hai

laayā hai rang phir gul-e-dāġh-e-junūñ mirā

shāyad nuzūl-e-nayyar-e-āzam hamal meñ hai

mujh riñd-e-bādah-kash ko ye jo ḳhauf-e-mohtasib

dil kī tarah chhupī huī botal baġhal meñ hai

bahr-e-sarashk dīda-e-dil meñ hai maujzan

dekho tilism-e-husn ki dariyā kañval meñ hai

ai mai-kasho tumhārī bhī dāvat kareñge ham

urs-e-janāb-e-pīr-e-muġhāñ āj-kal meñ hai

sān.e.a ne vo dahan na banāyā na kuchh likhā

ḳhālī jagah navishta-e-roz-e-azal meñ hai

ḳhat bhī diyā to qāsid-e-ġhaflat-shi.ār ko

naama mirā bañdhā huā bāzū-e-shal meñ hai

dast-e-junūñ ne phaaḌ ke pheñkā idhar-udhar

dāman abad meñ hai to garebāñ azal meñ hai

ashkoñ ke badle ḳhuun ke qatre Tapakte haiñ

battī hamāre zaḳhm kī raushan kañval meñ hai

dil phuk rahā hai garche ham āġhosh hai vo gul

pahlū meñ mere ḳhuld hai dozaḳh baġhal meñ hai

bīmār-e-ishq kahte haiñ dārushshifā use

aisī hī jo hasīn farañgī-mahal meñ hai

likhnā thā jo kuchh aap ko pahle hī likh diyā

hāl-e-abad bhī daftar-e-roz-e-azal meñ hai

pahlū meñ dil hamāre hai zeb-e-kanār-e-yār

āġhosh meñ hai dost to dushman baġhal meñ hai

vā'da kiyā thā aaj so phir kal pe Tal gayā

āḳhir hamārī maut isī āj-kal meñ hai

lapkā paḌā hai husn-parastī kā kis qadar

jab dekhiye 'qalaq' ko farañgī-mahal meñ hai

tasir jazb maston ki har har ghazal mein hai

e'jaz baD mein hai to karamat zaTal mein hai

dil mein jo apne yar hai to dil baghal mein hai

phir kyun hai gham ki sahab-e-KHana mahal mein hai

kitna ghurur hai tumhein husn-o-jamal par

go yaad-e-yar-e-husn tumhaare 'amal mein hai

hai yaad dil mein panja-e-rangin-e-yar ki

mehndi ke chor ka guzar apne mahal mein hai

bad-tar KHizan se hai hamein is bagh ki bahaar

boi nifaq phul mein hi zahr phal mein hai

lete hain bose un lab-o-gesu ke raat-din

mulk-e-yaman se taKHtan apne 'amal mein hai

munim ye kar-KHane hain duniya ke kar na fikr

koi hai jhonpaDe mein to koi mahal mein hai

jo ban gaya wo pech magar un ke hain wahi

rassi ka bal huzur ki zulfon ke bal mein hai

pahlu mein mujh hazin ke Tapakta hai raat-din

yarab ye dil hai ya koi phoDa baghal mein hai

itna laziz bagh-e-jahan mein samar hai kaun

jo zaiqa nihaal-e-tamanna ke phal mein hai

hasrat hai hum bhi kahte kisi din ye ai falak

ai dil mubarak aaj to dilbar baghal mein hai

dushnam de ke bose ye kah kah ke dete hain

in'am galiyon ke ye nemul-badal mein hai

laya hai rang phir gul-e-dagh-e-junun mera

shayad nuzul-e-nayyar-e-azam hamal mein hai

mujh rind-e-baadah-kash ko ye jo KHauf-e-mohtasib

dil ki tarah chhupi hui botal baghal mein hai

bahr-e-sarashk dida-e-dil mein hai maujzan

dekho tilism-e-husn ki dariya kanwal mein hai

ai mai-kasho tumhaari bhi dawat karenge hum

urs-e-janab-e-pir-e-mughan aaj-kal mein hai

sanea ne wo dahan na banaya na kuchh likha

KHali jagah nawishta-e-roz-e-azal mein hai

KHat bhi diya to qasid-e-ghaflat-shiar ko

nama mera bandha hua bazu-e-shal mein hai

dast-e-junun ne phaD ke phenka idhar-udhar

daman abad mein hai to gareban azal mein hai

ashkon ke badle KHun ke qatre Tapakte hain

batti hamare zaKHm ki raushan kanwal mein hai

dil phuk raha hai garche hum aaghosh hai wo gul

pahlu mein mere KHuld hai dozaKH baghal mein hai

bimar-e-ishq kahte hain darushshifa use

aisi hi jo hasin farangi-mahal mein hai

likhna tha jo kuchh aap ko pahle hi likh diya

haal-e-abad bhi daftar-e-roz-e-azal mein hai

pahlu mein dil hamare hai zeb-e-kanar-e-yar

aaghosh mein hai dost to dushman baghal mein hai

wa'da kiya tha aaj so phir kal pe Tal gaya

aaKHir hamari maut isi aaj-kal mein hai

lapka paDa hai husn-parasti ka kis qadar

jab dekhiye 'qalaq' ko farangi-mahal mein hai