silsila KHwabon ka sab yunhi dhara rah jaega

silsila ḳhvāboñ kā sab yūñhī dharā rah jā.egā

ek din bistar pe koī jāgtā rah jā.egā

ek ḳhvāhish dil ko ġhair-ābād kartī jā.egī

ik parinda duur tak uḌtā huā rah jā.egā

chār-sū phailī huī be-chehragī kī dhund meñ

ek din be-aks ho kar aa.ina rah jā.egā

har sadā se bach ke vo ehsās-e-tanhā.ī meñ hai

apne hī dīvār-o-dar meñ gūñjtā rah jā.egā

mudda.ā ham apnā kāġhaz par raqam kar jā.eñge

vaqt ke hāthoñ meñ apnā faislā rah jā.egā

do ghaḌī ke vāste aa kar chale jāoge tum

phir mirī tanhā.iyoñ kā silsilā rah jā.egā

ab diloñ meñ koī gunjā.ish nahīñ miltī 'hayāt'

bas kitāboñ meñ likhā harf-e-vafā rah jā.egā

silsila KHwabon ka sab yunhi dhara rah jaega

ek din bistar pe koi jagta rah jaega

ek KHwahish dil ko ghair-abaad karti jaegi

ek parinda dur tak uDta hua rah jaega

chaar-su phaili hui be-chehragi ki dhund mein

ek din be-aks ho kar aaina rah jaega

har sada se bach ke wo ehsas-e-tanhai mein hai

apne hi diwar-o-dar mein gunjta rah jaega

muddaa hum apna kaghaz par raqam kar jaenge

waqt ke hathon mein apna faisla rah jaega

do ghaDi ke waste aa kar chale jaoge tum

phir meri tanhaiyon ka silsila rah jaega

ab dilon mein koi gunjaish nahin milti 'hayat'

bas kitabon mein likha harf-e-wafa rah jaega