silsila KHatm hua jalne jalane wala

silsila ḳhatm huā jalne jalāne vaalā

ab koī ḳhvāb nahīñ niiñd uḌāne vaalā

ye vo sahrā hai sujhā.e na agar tū rasta

ḳhaak ho jaa.e yahāñ ḳhaak uḌāne vaalā

kyā kare aañkh jo pathrāne kī ḳhvāhish na kare

ḳhvāb ho jaa.e agar ḳhvāb dikhāne vaalā

yaad aatā hai ki maiñ ḳhud se yahīñ bichhḌā thā

yahī rasta hai tire shahr ko jaane vaalā

ai havā us se ye kahnā ki salāmat hai abhī

tere phūloñ ko kitāboñ meñ chhupāne vaalā

zindagī apnī añdheroñ meñ basar kartā hai

tere āñchal ko sitāroñ se sajāne vaalā

sabhī apne nazar aate haiñ ba-zāhir lekin

rūThne vaalā hai koī na manāne vaalā

le ga.iiñ duur bahut duur havā.eñ jis ko

vahī bādal thā mirī pyaas bujhāne vaalā

silsila KHatm hua jalne jalane wala

ab koi KHwab nahin nind uDane wala

ye wo sahra hai sujhae na agar tu rasta

KHak ho jae yahan KHak uDane wala

kya kare aankh jo pathrane ki KHwahish na kare

KHwab ho jae agar KHwab dikhane wala

yaad aata hai ki main KHud se yahin bichhDa tha

yahi rasta hai tere shahr ko jaane wala

ai hawa us se ye kahna ki salamat hai abhi

tere phulon ko kitabon mein chhupane wala

zindagi apni andheron mein basar karta hai

tere aanchal ko sitaron se sajaane wala

sabhi apne nazar aate hain ba-zahir lekin

ruThne wala hai koi na manane wala

le gain dur bahut dur hawaen jis ko

wahi baadal tha meri pyas bujhane wala