raat din chain hum ai rashk-e-qamar rakhte hain

raat din chain ham ai rashk-e-qamar rakhte haiñ

shaam avadh kī to banaras kī sahar rakhte haiñ

bhāñp hī leñge ishāra sar-e-mahfil jo kiyā

tāḌne vaale qayāmat kī nazar rakhte haiñ

DhūñDh letā maiñ agar aur kisī jā hote

kyā kahūñ aap dil-e-ġhair meñ ghar rakhte haiñ

ashk qaabū meñ nahīñ raaz chhupā.ūñ kyūñkar

dushmanī mujh se mire dīda-e-tar rakhte haiñ

kaise be-rahm haiñ sayyād ilāhī tauba

mausam-e-gul meñ mujhe kaaT ke par rakhte haiñ

kaun haiñ ham se sivā naaz uThāne vaale

sāmne aa.eñ jo dil aur jigar rakhte haiñ

dil to kyā chiiz hai patthar ho to paanī ho jaa.e

mere naale abhī itnā to asar rakhte haiñ

chaar din ke liye duniyā meñ laḌā.ī kaisī

vo bhī kyā log haiñ aapas meñ sharar rakhte haiñ

hāl-e-dil yaar ko mahfil meñ sunā.ūñ kyuuñ kar

mudda.ī kaan udhar aur idhar rakhte haiñ

jalva-e-yār kisī ko nazar aatā kab hai

dekhte haiñ vahī us ko jo nazar rakhte haiñ

āshiqoñ par hai dikhāne ko itaab ai 'jauhar'

dil meñ mahbūb ināyat kī nazar rakhte haiñ

raat din chain hum ai rashk-e-qamar rakhte hain

sham awadh ki to banaras ki sahar rakhte hain

bhanp hi lenge ishaara sar-e-mahfil jo kiya

taDne wale qayamat ki nazar rakhte hain

DhunDh leta main agar aur kisi ja hote

kya kahun aap dil-e-ghair mein ghar rakhte hain

ashk qabu mein nahin raaz chhupaun kyunkar

dushmani mujh se mere dida-e-tar rakhte hain

kaise be-rahm hain sayyaad ilahi tauba

mausam-e-gul mein mujhe kaT ke par rakhte hain

kaun hain hum se siwa naz uThane wale

samne aaen jo dil aur jigar rakhte hain

dil to kya chiz hai patthar ho to pani ho jae

mere nale abhi itna to asar rakhte hain

chaar din ke liye duniya mein laDai kaisi

wo bhi kya log hain aapas mein sharar rakhte hain

haal-e-dil yar ko mahfil mein sunaun kyun kar

muddai kan udhar aur idhar rakhte hain

jalwa-e-yar kisi ko nazar aata kab hai

dekhte hain wahi us ko jo nazar rakhte hain

aashiqon par hai dikhane ko itab ai 'jauhar'

dil mein mahbub inayat ki nazar rakhte hain