paikar-e-aql tere hosh Thikane lag jaen

paikar-e-aql tire hosh Thikāne lag jaa.eñ

tere pīchhe bhī jo ham jaise divāne lag jaa.eñ

us kā mansūba ye lagtā hai galī meñ us kī

ham yūñhī ḳhaak uḌāne meñ Thikāne lag jaa.eñ

soch kis kaam kī rah jā.egī terī ye bahār

apne andar hī agar ham tujhe paane lag jaa.eñ

sab ke jaisī na banā zulf ki ham sāda-nigāh

tere dhoke meñ kisī aur ke shāne lag jaa.eñ

raat bhar rotā huuñ itnā ki ajab kyā is meñ

Dher phūloñ ke agar mere sirhāne lag jaa.eñ

dasht karnā hai hameñ shahr ke ik goshe ko

to chalo kaam pe ham saare divāne lag jaa.eñ

'farhat' ehsās ab aisā bhī ik āhang ki log

sun ke ash'ār tire nāchne gaane lag jaa.eñ

paikar-e-aql tere hosh Thikane lag jaen

tere pichhe bhi jo hum jaise diwane lag jaen

us ka mansuba ye lagta hai gali mein us ki

hum yunhi KHak uDane mein Thikane lag jaen

soch kis kaam ki rah jaegi teri ye bahaar

apne andar hi agar hum tujhe pane lag jaen

sab ke jaisi na bana zulf ki hum sada-nigah

tere dhoke mein kisi aur ke shane lag jaen

raat bhar rota hun itna ki ajab kya is mein

Dher phulon ke agar mere sirhane lag jaen

dasht karna hai hamein shahr ke ek goshe ko

to chalo kaam pe hum sare diwane lag jaen

'farhat' ehsas ab aisa bhi ek aahang ki log

sun ke ash'ar tere nachne gane lag jaen