nae safar ki lazzaton se jism o jaan ko sar karo

na.e safar kī lazzatoñ se jism o jaañ ko sar karo

safar meñ hoñgī barkateñ safar karo safar karo

udaas raat ke gudāz jism ko TaTol kar

kisī kī zulf-e-sāya-dār kī girah meñ ghar karo

jo aañkh ho to dekh tū sarāb hī sarāb hai

na e'tibār tishnagī meñ mauj-e-āb par karo

purānī āstīn se purāne but karo rihā

na.ī zamīn par na.e ḳhudā ko mo'tabar karo

jamāl-e-yār se karo kabhī nazar ko paak bhī

ḳhayāl-e-yār se kabhī kabhī shabeñ sahar karo

nae safar ki lazzaton se jism o jaan ko sar karo

safar mein hongi barkaten safar karo safar karo

udas raat ke gudaz jism ko TaTol kar

kisi ki zulf-e-saya-dar ki girah mein ghar karo

jo aankh ho to dekh tu sarab hi sarab hai

na e'tibar tishnagi mein mauj-e-ab par karo

purani aastin se purane but karo riha

nai zamin par nae KHuda ko mo'tabar karo

jamal-e-yar se karo kabhi nazar ko pak bhi

KHayal-e-yar se kabhi kabhi shaben sahar karo