munh jo furqat mein zard rahta hai

muñh jo furqat meñ zard rahtā hai

kuchh kaleje meñ dard rahtā hai

thī kabhī rashk-e-mahr ke āshiq

dhuup kā rañg zard rahtā hai

kis ke sunte ho raat ko naale

kahte ho sar meñ dard rahtā hai

kabhī pūchhā na mere kūche meñ

kaun sahrā-navard rahtā hai

shor hai zard aa.ī hai āñdhī

kyā mirā rañg zard rahtā hai

yaad aatī haiñ garmiyāñ terī

dil hamārā bhī sard rahtā hai

kahte ho tujh ko dekhte haiñ ham

banda sahrā-navard rahtā hai

jis taraf baiThte the vasl meñ aap

usī pahlū meñ dard rahtā hai

kahte haiñ dil kī choT kā hai fasād

muñh 'ta.ashshūq' jo zard rahtā hai

munh jo furqat mein zard rahta hai

kuchh kaleje mein dard rahta hai

thi kabhi rashk-e-mahr ke aashiq

dhup ka rang zard rahta hai

kis ke sunte ho raat ko nale

kahte ho sar mein dard rahta hai

kabhi puchha na mere kuche mein

kaun sahra-naward rahta hai

shor hai zard aai hai aandhi

kya mera rang zard rahta hai

yaad aati hain garmiyan teri

dil hamara bhi sard rahta hai

kahte ho tujh ko dekhte hain hum

banda sahra-naward rahta hai

jis taraf baiThte the wasl mein aap

usi pahlu mein dard rahta hai

kahte hain dil ki choT ka hai fasad

munh 'tashshuq' jo zard rahta hai