misal-e-shoala-o-shabnam raha hai aankhon mein

misāl-e-sho.ala-o-shabnam rahā hai āñkhoñ meñ

vo ek shaḳhs jo kam kam rahā hai āñkhoñ meñ

kabhī ziyāda kabhī kam rahā hai āñkhoñ meñ

lahū kā silsila paiham rahā hai āñkhoñ meñ

na jaane kaun se aalam meñ us ko dekhā thā

tamām umr vo aalam rahā hai āñkhoñ meñ

tirī judā.ī meñ taare bujhe haiñ palkoñ par

nikalte chāñd kā mātam rahā hai āñkhoñ meñ

ajab banāv hai kuchh us kī chashm-e-kam-go kā

ki sail-e-āh koī tham rahā hai āñkhoñ meñ

vo chhup rahā hai ḳhud apnī panāh-e-mizhgāñ meñ

badan tamām mujassam rahā hai āñkhoñ meñ

azal se tā-ba-abad koshish-e-javāb hai 'shāz'

vo ik savāl jo mub.ham rahā hai āñkhoñ meñ

misal-e-shoala-o-shabnam raha hai aankhon mein

wo ek shaKHs jo kam kam raha hai aankhon mein

kabhi ziyaada kabhi kam raha hai aankhon mein

lahu ka silsila paiham raha hai aankhon mein

na jaane kaun se aalam mein us ko dekha tha

tamam umr wo aalam raha hai aankhon mein

teri judai mein tare bujhe hain palkon par

nikalte chand ka matam raha hai aankhon mein

ajab banaw hai kuchh us ki chashm-e-kam-go ka

ki sail-e-ah koi tham raha hai aankhon mein

wo chhup raha hai KHud apni panah-e-mizhgan mein

badan tamam mujassam raha hai aankhon mein

azal se ta-ba-abad koshish-e-jawab hai 'shaz'

wo ek sawal jo mubham raha hai aankhon mein