hum hain majruh majra hai ye

ham haiñ majrūh mājrā hai ye

vo namak chhiḌke hai maza hai ye

aag the ibtidā-e-ishq meñ ham

ab jo haiñ ḳhaak intihā hai ye

buud aadam numūd shabnam hai

ek do dam meñ phir huā hai ye

shukr us kī jafā kā ho na sakā

dil se apne hameñ gila hai ye

shor se apne hashr hai parda

yuuñ nahīñ jāntā ki kyā hai ye

bas huā naaz ho chukā aġhmāz

har ghaḌī ham se kyā adā hai ye

nāsheñ uThtī haiñ aaj yāroñ kī

aan baiTho to ḳhushnumā hai ye

dekh be-dam mujhe lagā kahne

hai to murda sā par balā hai ye

maiñ to chup huuñ vo hoñT chāTe hai

kyā kahūñ rījhne kī jā hai ye

hai re begāngī kabhū un ne

na kahā ye ki āshnā hai ye

teġh par haath dam-ba-dam kab tak

ik lagā chak ki mudda'ā hai ye

'mīr' ko kyuuñ na muġhtanim jaane

agle logoñ meñ ik rahā hai ye

hum hain majruh majra hai ye

wo namak chhiDke hai maza hai ye

aag the ibtida-e-ishq mein hum

ab jo hain KHak intiha hai ye

bud aadam numud shabnam hai

ek do dam mein phir hua hai ye

shukr us ki jafa ka ho na saka

dil se apne hamein gila hai ye

shor se apne hashr hai parda

yun nahin jaanta ki kya hai ye

bas hua naz ho chuka aghmaz

har ghaDi hum se kya ada hai ye

nashen uThti hain aaj yaron ki

aan baiTho to KHushnuma hai ye

dekh be-dam mujhe laga kahne

hai to murda sa par bala hai ye

main to chup hun wo honT chaTe hai

kya kahun rijhne ki ja hai ye

hai re begangi kabhu un ne

na kaha ye ki aashna hai ye

tegh par hath dam-ba-dam kab tak

ek laga chak ki mudda'a hai ye

'mir' ko kyun na mughtanim jaane

agle logon mein ek raha hai ye